ლეგენდარული როკ-ჯგუფის Queen-ის გიტარისტმა და ასტროფიზიკოსმა ბრაიან მეიმ ახალი წლის დადგომასთან ერთად ახალი სიმღერა გამოუშვა, სახელწოდებით New Horizons.

ასე ჰქვია ნასას ხომალდსაც, რომელმაც ახალი წლის ღამეს დედამიწიდან 6,4 მილიარდი კილომეტრის დაშორებით არსებული ობიექტს ჩაუფრინა და ფოტოები გამოგზავნა.

კოიპერის სარტყელის ობიექტი, Ultima Thule, გახდა დედამიწიდან ყველაზე დაშორებული ობიექტი, რომელიც კაცობრიობამ New Horizons-ის საშუალებით, ახლოდან შეისწავლა.

"New horizons to explore new horizons no one’s ever seen before [New Horizons-მა შეისწავლა ახალი ჰორიზონტები, რომლებიც აქამდე არავის უნახავს]", - მღერის მეი. ხომალდს დანიშნულების წერტილამდე მისაღწევად 12 წელი დასჭირდა.

4-წუთიან სიმღერაში ქუინის მსმენელი ნაცნობ ჰარმონიულ ვოკალსა და გიტარის უწყვეტ სოლოს აღმოაჩენს.

მეის სიტყვებით, სიმღერა სწორედ ნასას ხომალდის უკან მდგომი გუნდის შესახებაა. მან კომპოზიციას ასევე ადამიანების მისწრაფებების ჰიმნი უწოდა:

"ესაა ძიება და აღმოჩენა. უნდა ვიცოდეთ რა ხდება ჩვენ გარეთ. ამაზეა ჩემი სიმღერაც, ადამიანის შეუდრეკელ სულზე, რომელსაც მის გარშემო არსებული სამყაროს შესწავლა სურს".

დამთხვევაა, მაგრამ აღსანიშნავი, რომ მეის პირველი სოლო ჩანაწერი ასევე კოსმოსში მოგზაურობას ეძღვნებოდა. 1983 წელს მან გამოუშვა მინი-ალბომი, Star Fleet Project, რომელშიც კომპოზიტორი პოლ ბილისის კომპოზიცია, ბრიტანული სამეცნიერო ფანტასტიკის ჟანრის სერიალისთვის Star Fleet, მძიმე როკის ვერსიით ჩაწერა.