ბოლო რამდენიმე კვირის განმვალობაში საქართველოში H1N1-ის ვირუსის, ე.წ. ღორის გრიპის შემთხვევებმა იმატა. ფეისბუქის ზოგიერთი მომხმარებელი ირწმუნება, რომ ვირუსთან საბრძოლველად წყალბადის ზეჟანგი, იგივე "პერეკისი" ეფექტური საშუალებაა, რაც მედიკოსების თქმით, სიმართლე არაა.

ფეისბუქის მომხმარებლები წყალბადის ზეჟანგით მკურნალობაზე საუბრისას რუსი ექიმის, ივან ნეუმივაკინის მოსაზრებებს ეყრდნობიან. ნეუმივაკინი არატრადიციული და კოსმიური მედიცინის მიმდევარი იყო. განსაკუთრებული პოპულარობა მოიპოვა, როგორც წყალბადის ზეჟანგით მკურნალობის მეთოდის გამომგონებელმა.

ჯანდაცვის მინისტრის, დავით სერგეენკოს განცხადებით, წყალბადის ზეჟანგის ეფექტზე არც ერთი დადასტურებული კვლევა არ მეტყველებს. ამავე მოსაზრებას იზიარებს დაავადებათა კონტროლისა და საზოგადოებრივი ჯანმრთელობის ცენტრის დირექტორის ამირან გამყრელიძე და დასძენს, რომ ზეჟანგთან დაკავშირებით არც ერთი მეცნიერული გამოცდილება არ არსებობს და მას რეკომენდაციას არ უწევენ.

"გრიპის დროს თვითმკურნალობა არ არის მისაღები. რეკომენდებულია მხოლოდ ის, რომ ექიმს დროულად დაუკავშირდეთ და იმოქმედოთ ექიმის დანიშნულების მიხედვით", — უთხრა On.ge-ს ამირან გამყრელიძემ.

ვირუსის შემთხვევები საქართველოში

დაავადებათა კონტროლის 7 იანვრის ინფორმაციით, 100 ათას მოსახლეზე გრიპის ვირუსი 256 ადამიანს დაუფიქსირდა, რაც წინა კვირის მაჩვენებელთან შედარებით 21-ით ნაკლებია. გამყრელიძის განმარტებით, ლაბორატორიულად H1N1-ის 158 შემთხვევა დადასტურდა, ხოლო 4 შემთხვევა H3N2-ის.

გაზრდილი მოთხოვნის გამო ანტივირუსულ პრეპარატ ტამიფლუს დეფიციტი შეიქმნა. ჯანდაცვის სამინისტრომ აფთიაქებს მედიკამენტის დამატებითი მარაგი გადასცა. ტამიფლუ ოთხ სააფთიაქო ქსელში გაიყიდება: PSP, ავერსი, GPS და ფარმადეპო.

პრეპარატს უფასოდ მიიღებენ ორსულები, სოციალურად დაუცველები, ბავშვები, ასაკით პენსიონერები, გულსისხლძარღვთა, დიაბეტით, ონკოლოგიური და სასუნთქი სისტემის დაავადებების მქონე მოქალაქეები. პრეპარატის უფასოდ მისაღებად საჭიროა, ბენეფიციარებმა მიაკითხონ მუნიციპალურ საზოგადოებრივი ჯანდაცვის ცენტრებს და წარადგინონ ექიმის დანიშნულება (ფორმა 100).

კონკრეტულად აფთიაქის რომელ ფილიალებში იყიდება პრეპარატი, მოქალაქეებმა ჯანდაცვის სამინისტროს (1505) ან აფთიაქის ცხელ ხაზზე უნდა დარეკონ:

• PSP — (032) 2 40 20 20;
• ავერსი — (032) 2 90 08 00;
• GPS — (032) 271 0707;
• ფარმადეპო — (032) 2 40 00 04.

სეზონური გრიპი

დაავადებათა კონტროლის ცენტრის სარეკომენდაციო ბროშურაში წერია, რომ გრიპი მსოფლიოში ერთ-ერთი ყველაზე უფრო გავრცელებული ინფექციაა. გრიპის სეზონური ეპიდემიის დროს ყოველწლიურად 3-5 მილიონ მძიმე შემთხვევას ფიქსირდება. ცნობილია გრიპის ვირუსის სამი ტიპი: A, B, C.

ამჟამად, მსოფლიოში სეზონურ გრიპს იწვევს A ქვეტიპის ორი ვირუსი, მათ შორის ე.წ. ღორის გრიპი და B ტიპის ვირუსები. გრიპის C ტიპის ვირუსი ხასიათდება მსუბუქი სიმპტომატიკით და ლოკალური ეპიდაფეთქებებით.

რეკომენდაციები

თუ ადამიანს გამოუვლინდა გრიპის სიმპტომები, უცაბედად დაწყებული მაღალი ცხელება, ყელის ტკივილი, ხველა და საერთო ინტოქსიკაცია, კუნთების, სახსრების, თავის ტკივილი, მაშინ:

• გრიპით დაავადებულთა სამკურნალოდ არ გამოიყენება ანტიბიოტიკი;
• იმ შემთხვევაში თუ გამოვლინდება ისეთი სიმპტომები, როგორიცაა — სუნთქვის გართულება, ქოშინი, ცხვირ-ტუჩის მიდამოს ციანოზი, მოვარდისფრო სისხლიანი ნახველი, ლეთარგია, გახანგრძლივებული ცხელება, ჩვილ ბავშვებში ძუძუს წოვის შეუძლებლობა, გაუწყლოება, ყიფლიბანდის დაძაბულობა — სასწრაფოდ მიმართეთ ექიმს;

• მაქსიმალურად უნდა მოერიდოს საზოგადოებრივი თავშეყრის ადგილებს;

• სასკოლო, სააღმზრდელო დაწესებულებებში არ დაუშვან გრიპისმაგვარი დაავადების სიმპტომების მქონე პირები;

• ყველა დაავადებულმა გამოიჩინოს მოქალაქეობრივი პასუხისმგებლობა და გრიპისმაგვარი დაავადების სიმპტომებისას, ექიმთან მიმართვამდე, თვითოზალიაციაში იყვნენ;

• განსაკუთრებული სიფრთხილე გამოიჩინონ ორსულებმა და ქრონიკული დაავადებების მქონე პირებმა;

• ხშირად დაიბანეთ ხელები;

• სპირტისშემცველი ხელის დასამუშავებლებით აღიჭურვოს ისეთი საზოგადოებრივი თავშეყრის ადგილები, სადაც მოსალოდნელია დაავადებულ პირთა შეკრება: აფთიაქები, პოლიკლინიკები, საავადმყოფოები, საბანკო მომსახურების ცენტრები, სატელეფონი კავშირგაბმულობისა და სხვა მომსახურების ოფისები;

• ხელის დასამუშავებლები უნდა განლაგდეს მოქალაქეთათვის ხელმისაწვდომ და თვალსაჩინო ადგილას;

• სივრცეები, სადაც არიან ან იყვნენ დაავადებული, საჭიროა სტანდარტული სველი წესით დასუფთავდეს, სპეციალური სადეზინფექციო სამუშაოების გარეშე;

• რეკომენდებულია სათავსოების ხშირი განიავება.

დეტალური რეკომენდაციები წაიკითხეთ აქ.