გუშინ ნიუ-იორკის მედისონ სქვეარ გარდენი MTV-ის მუსიკალური ვიდეოების დაჯილდოების, Video Music Awards-ის, ოცდამეცამეტე ცერემონიას მასპინძლობდა.

აღნიშნული შოუ ყოველთვის გამოირჩეოდა ეპატაჟური და სკანდალური ეპიზოდებით და ეს "ტრადიცია" არც წელს დარღვეულა. არიანა გრანდემ და ნიკი მინაჟმა დუეტში შეასრულეს სიმღერა Side to Side. რომლის დასრულების დროსაც სცენაზე მყოფ მოცეკვავე მამაკაცებს მოუხმეს და თავიანთი გამოსვლა ორალური სექსის სიმულაციით დაასრულეს.

თუმცა ამ მოვლენაზე სკანდალურად ის უფრო მეჩვენება, რომ ზაფხულის საუკეთესო სიმღერად ეს საშინელება დასახელდა.

საუკეთესო ჰიპ-ჰოპ ვიდეოს კატეგორიაში კი დრეიკმა გაიმარჯვა. ამ ვიდეოში განსაკუთრებული რა არის არ ვიცი, ან სხვა ნომინანტებმა ამაზე უარესის გადაღება როგორ მოახერხეს ეგეც მიკვირს. თუმცა მადლობელი ვარ, რომ სიმღერა არ შეაქეს და არ დააჯილდოვეს. დრეიკის ეს ტრეკი თანამედროვე მეინსტრიმ ჰიპ-ჰოპის გულისამრევი პრიმიტიულობის საუკეთესო დემონსტრირებაა.

მამაკაცი შემსრულებლის საუკეთესო კლიპის კატეგორიაში გაიმარჯვა სიმღერამ, რომლის მსგავსი, და შეიძლება უფრო უკეთესი, ქართული კლიპები, თავის დროზე, კავკასიასა და მაესტროზე გადიოდა. განათებულ კუბში (დრეიკის მსგავსად) მოცეკვავე რიანა და ლაზერშოუ. ამ ყველაფრის მერე საერთოდ აღარ მიკვირს, რომ Batman VS Superman, Suicide Squad და Star Wars Episode VII ხალხს მოეწონა და გაყიდვების ლიდერებად მოგვევლინენ.

საუკეთესო კოლაბორაციაში გაიმარჯვა ვიდეომ, რომელსაც კოლაბორაციის კუთხით მეორე მსოფლიო ომის დროს ფრანგებისა და ნაცისტების კოლაბორაციაც კი სჯობს.

ქალი შემსრულებლის საუკეთესო კლიპის კატეგორიაში Beyonce - Hold Up-მა გაიმარჯვა.

ფოტო: Beyonce

წლის ახალი არტისტი, ან აღმოჩენა, როგორც გინდათ ისე დაუძახეთ, გახდა DNCE, რომელიც ხმოვან გამოტოვებული Dance ანუ იცეკვა, ალბათ. მსგავსი აღმოჩენები სამყაროში ბალანსის დასაცავადაა საჭირო. თუ ყოველდღიურად ისეთი კარგი აღმოჩენები კეთდება, როგორიცაა კიბოს განკურნების გზა, ახალი ეგზოპლანეტა, კოსმოსში გამგზავრების ახალი ტექნოლოგია და ა.შ. გამოდის, რომ რაღაც ცუდიც უნდა მოხდეს.

წლის ვიდეო

წლის როკ-ვიდეო. Suicide Squad-ის სეანსებზე ეს ვიდეო გაეშვათ ორ საათიან ლუპზე, ბევრად კარგი იქნებოდა.

წლის ელექტრონული ვიდეო. ქერა ლამაზი გოგო ცეკვავს კლუბში, იახტაზე, აუზთან, აქა-იქ ორი დელფინი.

MTV VMA-ს გამარჯვებულებს მაყურებელი ირჩევს, ჰოდა... რა ჭირს ამ ხალხს?