TI-ის ინფორმაციით, შეკითხვას, უნდა აიკრძალოს თუ არა ისეთი რუსული ტელეარხების საქართველოში ტრანსლირება, რომლებიც რუსეთის სახელმწიფოს მიერ კონტროლდება, რუსეთის იმპერიალისტური იდეების აშკარა პროპაგანდას და ფაქტების ხელოვნურ დამახინჯებას ეწევა, გამოკითხულ პარტიათა უმრავლესობამ უარყოფითად უპასუხა. ინფორმაცია TI-ის ახალ ვებსაიტზე გამოქვეყნებული გამოკითხვის შედეგებიდან გახდა ცნობილი.

რაც შეეხება დადებით პასუხს, გამოკითხული 7 პარტიიდან ასეთი მხოლოდ რესპუბლიკურ პარტიას ჰქონდა, რომელმაც განმარტა, რომ ასეთი არხები მხოლოდ ქვეყნის ისეთ რეგიონებში უნდა აიკრძალოს, სადაც ინფორმაციის მიღების ძირითადი წყარო რუსული არხებია.

იდეის მოწინააღმდეგეები კი არიან:

  • ენმ,
  • ეროვნული ფორუმი,
  • გირჩი,
  • თავისუფალი დემოკრატები,
  • მრეწველები,
  • დემოკრატიული მოძრაობა - ერთიანი საქართველო.

საერთაშორისო გამჭვირვალობა - საქართველომ ახალი ვებსაიტის პრეზენტაცია დღეს გამართა. საიტზე შესული მომხმარებელი კითხვარს ავსებს, შემდეგ კი თავის პასუხებს სხვადასხვა პოლიტიკური პარტიების მიერ გაცემულ შესაბამის პასუხებს ადარებს, რომლებიც, თავის მხრივ, მათი საარჩევნო პროგრამების მიხედვითაა შევსებული.

კითხვები კატეგორიებად არის დაყოფილი, რომელშიც შედის სოციალურ-ეკონომიკური, გარემოსდაცვითი, საშინაო, ჯანდაცვის, საგარეო პოლიტიკისა და განათლების საკითხები.

აღსანიშნავია, რომ TI-ის თხოვნის შესაბამისად, კითხვარი მხოლოდ 7-მა პარტიამ შეავსო. რაც შეეხება მოძრაობას პაატა ბურჭულაძე - სახელმწიფო ხალხისთვის, საქარველოს კონსერვატიული პარტიას, ლეიბორისტულ პარტიასა და პატრიოტთა ალიანსს, მათ კითხვარის შევსებისგან, სხვადასხვა მიზეზის გამო, თავი შეიკავეს.

კითხვარის შევსებაზე უარი ქართულმა ოცნებამაც თქვა.