მობილურმა ოპერატორმა "ვიონი საქართველომ" (ბრენდი "ბილაინი") მემორანდუმი გააფორმა, რომლის თანახმადაც კომპანია ფშავ-ხევსურეთსა და გუდამაყარში ფართოზოლოვანი ინტერნეტიზაციის ხელშეწყობის პროექტის ფარგლებში, უფასო კოლოკაციის მომსახურებას მიაწვდის.

პროექტის მიზანია, ფშავში, ხევსურეთსა და გუდამაყარში დასახლებული პუნქტებისა და ტურისტული კონცენტრაციის ადგილების მაღალსიჩქარიანი ფიქსირებული უსადენო ინტერნეტით მომსახურების უზრუნველყოფა.

რთული გეოგრაფიული პირობებისა და მოსახლეობის სიმცირის გამო, მოცემულ რეგიონში არ არის ოპტიკური ქსელი. შესაბამისად, საქართველოს ეკონომიკისა და მდგრადი განვითარების სამინისტროს და ინტერნეტ საზოგადოების (ISOC) მხარდაჭერით და "საქართველოს მცირე და საშუალო სატელეკომუნიკაციო ოპერატორების ასოციაციის" კოორდინაციით, ხორციელდება მაგისტრალური რადიოქსელის მშენებლობა.

აშენების შემდგომ, ქსელი სამართავად გადაეცემა თავად ბენეფიციარს - ადგილობრივ მოსახლეობას, რომელიც წარმოგენილია ააიპ "მთის სათემო ქსელის" მიერ. საქმიანობიდან მიღებულ მოგებას ბენეფიციარი ისევ მიმართავს ქსელის განვითარებაზე. პროექტის ფარგლებში ასევე დაგეგმილია მიკრო და მცირე მეწარმეებისა და კოოპერატივების ტრენინგი და ელექტრონული სერვისების მიმართ ცნობადობის ამაღლება.

მემორანდუმი გაფორმდა "საქართველოს ინტერნეტ მმართველობის ფორუმი 2018"-ის მიმდინარეობისას, ინტერნეტ საზოგადოების ევროპული ბიუროს, შპს "ვიონი საქართველოსა" და ააიპ "მთის სათემო ქსელს" შორის.