საქართველოს პრეზიდენტის სარეზერვო ფონდი შეიძლება გაუქმდეს. 2019 წლის ბიუჯეტის პროექტში ცვლილებები შევიდა და 5-მილიონიანი ბიუჯეტი გამქრალია.

საქართველოს პრეზიდენტის ადმინისტრაციის მოქმედი ხელმძღვანელი, გიორგი აბაშიშვილი ამბობს, რომ ამით სარეზერვო ფონდი პრაქტიკულად გაუქმდა, რადგან მთლიანად "წაღებულია" მისთვის გამოყოფილი თანხა.

მისი თქმით, მოქმედი პრეზიდენტის, გიორგი მარგველაშვილის პრეზიდენტობის დროს 400-მდე პროექტი დაფინანსდა, რომლის მიზანიც დემოკრატიის ხელშეწყობას, სამოქალაქო ინსტიტუტების გაძლიერებას, სახელმწიფო ინსტიტუციების დაცულობას და ა.შ.

"ახლა სრულიად გაურკვეველია როგორ განახორციელებს შემდეგი პრეზიდენტი მსგავსი სახის ინიციატივებს, რომელიც ესოდენ მნიშვნელოვანი იყო ჩვენი ქვეყნის დემოკრატიული განვითარებისთვის", — ამბობს აბაშიშვილი.

საპარლამენტო უმრავლესობის წევრი, რომან კაკულია ამბობს, რომ ამ პრეზიდენტის სარეზერვო ფონდთან დაკავშირებით კონსულტაციები მიმდინარეობს.

"არ გამოვრიცხავ, რომ მუშავდებოდეს გაერთიანების იდეა, რადგან მთავრობასაც აქვს მსგავსი ფონდი და გაიწეროს რა ტიპის ხარჯები ექნება პრეზიდენტს და რა — მთავრობას", — ამბობს კაკულია On.ge-სთან საუბრისას და დასძენს, რომ აუცილებელია პრეზიდენტს მსგავსი ტიპის ხარჯები ჰქონდეს.

2019 წლის ბიუჯეტის რედაქტირებული პროექტითვე პრეზიდენტის ადმინისტრაციის ბიუჯეტი მცირდება და 9,8 მილიონის ნაცვლად 6 მილიონი იქნება.