რესპუბლიკური პარტია, ხვალ, 2 დეკემბერს გაერთიანებული ოპოზიციის მიერ დაანონსებული აქციის მიმართ სოლიდარულია, თუმცა თავად არ შეუერთდება. ამის შესახებ ჟურნალისტებს პარტიის თავმჯდომარემ, ხათუნა სამნიძემ განუცხადა.

სამნიძე, იზიარებს გაერთიანებული ოპოზიციის შეხედულებას, რომ საარჩევნო სისტემა ძირეულად შესაცვლელია.

"ჩვენ ამ მოთხოვნებში ვართ მათთან სოლიდარული, ვეთანხმებით. ძირითადი თემა არის საარჩევნო გარემო, საარჩევნო პროცედურები, საარჩევნო სისტემა, რაც ძირეულად შესაცვლელია. ჩვენ მათ მხარს ვუჭერთ ამ ინიციატივებში და მხარს დავუჭერთ მომავალშიც. გაერთიანებული ოპოზიცია ხვდება თავის მხარდამჭერებს და, რა თქმა უნდა, ჩვენც სოლიდარობას ვუცხადებთ ამ ადამიანებს, გაერთიანებულ ოპოზიციას, მათ შორის, მოთხოვნებს, რომელიც აქ გაჟღერდება. ჩვენ არ ვიქნებით წარმოდგენილი თავად აქციაზე,“— განაცხადა ხათუნა სამნიძემ.

ხუთშაბათს, 29 ნოემბერს ფილარმონიაში მხარდამჭერებთან შეხვედრის დროს ვაშაძემ განაცხადა, რომ არჩევნების მეორე ტურის შედეგებს არ აღიარებს. 2 დეკემბერს რუსთაველის გამზირზე გაერთიანებული ოპოზიცია საპროტესტო აქციას გამართავს.