Vantagenews ფოტოგრაფები ავრცელებენ კანის სანაპიროზე გადაღებულ კადრებს, რომლებშიც ჩანან საფრანგეთის პოლიციის თანამშრომლები მუსლიმ ქალთან ერთად.

სამართალდამცავები მოქალაქეს ჰიჯაბისა და ბურკინის გახდას თხოვენ, წინააღმდეგ შემთხვევაში ჯარიმით იმუქრებიან. ინფორმაციას გარდიანი ავრცელებს.

დამსვენებლებმა პოლიცია მას შემდეგ გამოიძახეს, რაც 34 წლის მუსლიმმა ქალმა მათი მოთხოვნის შემდეგ თავსაბურავი არ მოიხსნა. პოლიციამ მუსლიმი ქალი 11 ევროთი დააჯარიმა.

გამოცემასთან საუბარში აღნიშნულმა პირმა განაცხადა, რომ მას თავსაბურავი ეხურა და ზღვაში შესვლას არ აპირებდა. თვითმხილველები აცხადებენ, რომ ფაქტს საზოგადოებისგან არაერთგვაროვანი რეაქცია მოყვა, მათი ნაწილი პოლიციის ქმედებამ გააღიზიანა, ნაწილი კი მათ ტაშს უკრავდა და მოუწოდებდნენ მუსლიმ დამსვენებლებს, სახლში დაბრუნებულიყვნენ.

კანის მერის დევიდ ლისნარდის თქმით, ახალი რეგულაცია მოითხოვს, რომ ქალებმა პლაჟზე სეკულარული ტანსაცმელი ატარონ. რეგულაცია კრძალავს ბურკინის ტარებას, თუმცა არ ზღუდავს თავსაბურავს.

საქართველოში, აღნიშნულ ფაქტს არასამთავრობო ორგანიზაცია ქალთა მზერა ფეისბუკის გვერდზე გამოეხმაურა და მუსლიმ ქალებს სოლიდარობა გამოუცხადა.

"საფრანგეთის პოლიცია სანაპიროზე მყოფ ქალებს ბურკინის გახდას აიძულებს და შემდგომ აჯარიმებს, ქალთა მზერა მიიჩნევს რომ ეს ფაქტი პირველ რიგში ქალთმოძულეობრივია. კანის და ნიცის მმართველობის ისლამოფობია და ქალთმოძულეობა ყველა საზღვარს სცილდება.

ქალთა მზერა სოლიდარობას უცხადებს მუსლიმ ქალებს!"

საფრანგეთის 15 ქალაქში ბურკინის ტარება აიკრძალა. ადგილობრივი ხელისუფლება მიზეზად მოსახლეობის შეშფოთებას და უსაფრთხოების ზომების გამკაცრებას ასახელებს, რაც ბოლოდროინდელი ტერაქტებითაა გამოწვეული.