ქოთნის ყვავილების მოვლა და მათი ყურება ძალიან სასიამოვნო პროცესია. ხეების ნაცვლად, მაღალსართულიანი შენობების გარემოცვაში მყოფებს ფანჯრის რაფაზე შემოდებული ერთი პატარა მცენარეც კი საგრძნობლად გვიმსუბუქებს სტრესს, თუმცა, ზამთრის დადგომასთან ერთად ჩვენი ოთახის ბინადრები სერიოზული საფრთხის წინაშე დგებიან.

საფრთხე ემუქრება ჩვენს განწყობასაც, რადგან მოლოდინი, რომ მცენარე გაიხარებს და გაზაფხულზე ფერადი ყვავილებით დაგვასაჩუქრებს, შეიძლება არ გამართლდეს.

არასასურველი შედეგების თავიდან ასაცილებლად კი ჩამოგითვლით იმ 5 საფრთხეს, რომელიც ქოთნის ყვავილებს ზამთარში ემუქრება:

1. სიცივე

ფოტო: Ambius

ზამთრის დადგომისთანავე ყველანაირად ვცდილობთ, რომ გარეთ გამეფებულ მკაცრს სეზონს მოვერგოთ და თავი კომფორტულად ვიგრძნოთ. ასე არიან ქოთნის ყვავილებიც. თუმცა, განსხვავება ის არის, რომ ზამთრის უსაფრთხოდ გადასატანად, ჩვენს დახმარებას მათთვის სასიცოცხლო მნიშვნელობა აქვს.

ამიტომ, აუცილებელია, რომ მცენარეები, რომლებიც აივანზე ან ფანჯრის გარეთა რაფაზე გვიდევს, სიცივეს მოვარიდოთ.

2. ოთახის გამათბობელი

ფოტო: stackexchange

მცენარეების სახლში შემოტანის შემდეგ, შეიძლება იფიქროთ, რომ ოთახის გამათბობლის სითბო მათაც ისევე ესიამოვნებათ, როგორც თქვენ.

სინამდვილეში, გამათბობლის სიახლოვეს ყოფნა ქოთნის ყვავილისთვის ერთ-ერთი სერიოზული საფრთხეა და თუ არ გინდათ, რომ თქვენი ყვავილი ზედმეტმა სიცხემ დააჭკნოს, ის ისეთ ოთახში დადეთ, სადაც თერმომეტრი ნაკლებ ტემპერატურას აჩვენებს.

3. ცუდი განათება

ფოტო: lifetransplanet

მეორე პუნქტის წაკითხვის შემდეგ, თუ თქვენი ქოთნის ყვავილები სასწრაფოდ საკუჭნაოში, ან სახლის რომელიმე უფანჯრო კუთხეში გადადგით, ძალიან შემცდარხართ. მცენარეებს არ უყვართ ჩაბნელებულ ოთახში ცხოვრება, რადგან განათებას მათი ზრდა-განვითარებისთვის გადამწყვეტი მნიშვნელობა აქვს.

4. ზედმეტი მორწყვა

ფოტო: swansonsnursery

რა სიხშირით უნდა მოვრწყათ ზამთარში ყვავილი? ეს იმაზეა დამოკიდებული, თუ რომელ მცენარეს ვუვლით, რადგან ზედმეტმა წყალმა ზამთარში ქოთნის ყვავილი შეძლება გააფუჭოს კიდეც.

მაგალითად, კაქტუსი თუ გრილ ადგილას დევს, ზამთარში მორწყვას არც საჭიროებს. თუმცა, ეს არ ნიშნავს, რომ სხვა ქოთნის ყვავილებიც უწყლოდ გადარჩებიან. მათ ნამდვილად სჭირდებათ მორწყვა, ოღონდ, არა იმ სიხშირით, როგორც ზაფხულში.

5. შინაური ცხოველი

ფოტო: wallhere

ქოთნის ყვავილები შეიძლება შინაურმა ცხოველმაც გაგიფუჭოთ. ბუნებრივია, კატებს ხო ძალიან უყვართ მიწაში ქექვა, ძაღლები კი ცნობისმოყვარეები არიან. ეცადეთ მცენარეები ისეთ ადგილას დადოთ, სადაც მათი თათები ნაკლებად მისწვდება.

თემაზე, თუ როგორ მოვამზადოთ მცენარეები ზამთრისთვის, სხვა შუადღის ეთერში აგროტექნოლოგმა, ნინო ხარხელაურმაც ისაუბრა.