პატრიოტთა ალიანსის ლიდერი ირმა ინაშვილი On.ge-სთან საუბარში აცხადებს, რომ თბილისის ქუჩებში გამოჩენილი ახალი ბილბორდები, წარწერით, "არა ნაცებს! არა ბოროტებას!", მათი პარტიის დაკვეთით არ გაკეთებულა.

ბილბორდზე მიხეილ სააკაშვილი, ვანო მერაბიშვილი, ბაჩო ახალაია, ნიკა გვარამია, ზურაბ ადეიშვილი და სხვები არიან გამოსახულნი.

"მე ვიზიარებ სულისკვეთებას, არა ნაციონალურ მოძრაობას, არა წარსულში დაბრუნებას და არა იმ რეჟიმის განმეორებას, მაგრამ ხაზგასმით ვამბობ, რომ კონკრეტულად ეს ბანერები, "არა ნაცებს!, არა ბოროტებას!" არ ეკუთვნის ჩვენს პარტიას. ჩვენ არ ვართ ამ ბანერების გავრცელების ორგანიზატორები", — ამბობს ირმა ინაშვილი.

ირმა ინაშვილმა განმარტა, რომ ისინი მართლაც ამზადებენ ბანერებს, რაც 23 და 25 ნოემბერს თბილისსა და ბათუმში დაგეგმილ აქციებს უკავშირდება, თუმცა მისივე თქმით, მასზე ყოფილი ხელისუფლების წევრების ფოტოები არაა გამოსახული.