სამოქალაქო სექტორზე თავდასხმა, ადმინისტრაციული რესურსების ბოროტად გამოყენება, საჯარო მოხელეებზე ზეწოლა და კოორდინატორების მობილიზება — სწორედ ამ საკითხზე გაამახვილა ყურადღება საერთაშორისო სადამკვირვებლო დელეგაციამ. დღეს, 29 ოქტომბერს პრესკონფერენციაზე დელეგაციამ არჩევნების დღის მიმდინარეობა და არჩევნებისთვის სამზადისი შეაფასა.

ორგანიზაციების განცხადებით, წინასაარჩევნო პერიოდი როგორც პოზიტიური, ისე ნეგატიური ნიშნებით ხასიათდებოდა. მათ აღნიშნეს, რომ მედიაპლურალიზმის მიუხედავად, ზოგიერთი მედია საშუალება ასევე პოლიტიკური და სამართლებრივი წნეხის ქვეშ მოექცა.

მათ, ასევე ყურადღება გაამახვილეს სამოქალაქო სექტორზე ხელისუფლების მხრიდან თავდასხმები და მათ "აგრესიული, პერსონალური და უპრეცედენტო" უწოდეს.

"ერთი პარტიის მიერ ძალაუფლების ყველა შტოს დომინირების და შესუსტებული საპრეზიდენტო უფლებამოსილებების პირობებში, სამოქალაქო საზოგადოება და მედია შეკავებისა და გაწონასწორების დემოკრატიულ მექანიზმებად რჩება. ხელისუფლების ლიდერების მხრიდან მათზე თავდასხმის შედეგად გამოწვეული ზიანი, შესაძლოა, არჩევნების პერიოდს გასცდეს და ქვეყნის დემოკრატიულ განვითარებაზე საზიანო გავლენა იქონიოს", — განაცხადა დელეგაციამ.

მათივე თქმით, არათანაბარ საარჩევნო პირობებთან და ადმინისტრაციული რესურსების ბოროტად გამოყენებასთან დაკავშირებული პრობლემები კვლავაც გადაუჭრელია.

დელეგაცია შეშფოთებულია სამოქალაქო საზოგადოების ანგარიშებით, რომლის მიხედვითაც საჯარო მოხელეებზე ზეწოლა ხორციელდებოდა, რათა მათ ქართული ოცნების მიერ მხარდაჭერილი კანდიდატის სასარგებლოდ ხმების მობილიზება მოეხდინათ. როგორ ისინი ამბობენ, ეს საკითხები წინა ხელისუფლებების დროსაც პრობლემური იყო.

"მიუხედავად იმისა, რომ ხელისუფლებამ საჯარო მოხელეებს სათანადო ქცევისკენ მოუწოდა, ნათელია, რომ ეს საკმარისი არ აღმოჩნდა. ხელისუფლებამ ყველა ზომას უნდა მიმართოს იმის დასამტკიცებლად, რომ ისინი ნამდვილად გეგმავენ არსებული პრაქტიკის შეცვლას, მათ შორის მკაცრი სანქციებისა და ზედამხედველობის მექანიზმების გატარებას", — განაცხადა დელეგაციამ.

ერთ-ერთი მთავარი საკითხი, რაც არჩევნების დღეს ადგილობრივმა სადამკვირვებლო ორგანიზაციებმა გამოკვეთეს საარჩევნო უბნებს გარეთ კანდიდატების აქტივისტების მასშტაბურ მობილიზებას უკავშირდება. მათივე თქმით, ეს პრაქტიკა უმეტესად ქართული ოცნების წარმომადგენლებს ეხებათ.

მიუხედავად იმისა, რომ ამომრჩევლების მობილიზება უკანონო ქმედება არ არის, სამოქალაქო საზოგადოების ორგანიზაციებმა ეს ამომრჩევლებზე ზეწოლად შეაფასეს.

დელეგაცია მეორე ტურის წინ შესასრულებლად შემდეგ რეკომენდაციებს გასცემს:

• მთავრობის ლიდერებმა და სახელმწიფო თანამდებობის პირებმა არასამთავრობო ორგანიზაციებზე თავდასხმა უნდა შეწყვიტონ და არასამთავრობო ორგანიზაციებისთვის ხელშემწყობ გარემოს უნდა დაუჭირონ მხარი;
• საერთაშორისო საზოგადოებამ არასამთავრობო ორგანიზაციებზე თავდასხმები უფრო ძლიერად და საჯაროდ უნდა დაგმოს და მათდამი მხარდაჭერა გამოხატოს. მნიშვნელოვანია მეორე ტურისთვის სადამკვირვებლო ორგანიზაციების დაფინანსება;
• მეორე ტურისთვის საჯარო მოხელეების ქცევის რეგულირებისთვის მთავრობამ კიდევ ერთი დირექტივა უნდა გამოსცეს და ამ დირექტივას მისი უზრუნველყოფისთვის მკაცრი სანქციები და ზედამხედველობის მექანიზმები დაამატოს;
• პარტიებმა ხელი უნდა მოაწერონ ქცევის კოდექსს, რომლის თანახმად ისინი დაშინების და ადმინისტრაციული რესურსის გამოყენების ყველა ფორმისგან თავს შეიკავებენ, ხოლო დამრღვევებს შიდა სანქციებს დააკისრებენ;
• კამპანიებმა და მედიამ დარჩენილ პერიოდში მუქარის რიტორიკისგან და პირადი შეტევებისგან თავი უნდა შეიკავონ და ამის ნაცვლად კანდიდატების პლატფორმასა და ხედვაზე გაამახვილონ ყურადღება.