პოლიციამ პარლამენტის წინ გუშინ, 26 ოქტომბერს აქტივისტების მიერ დადგმული კარვები დაშალა და ტერიტორიიდან გაიტანა. კარვების გატანის ვიდეომასალას ფეისბუქგვერდი მამები სიმართლისთვის ავრცელებს.

26 ოქტომბერს პარლამენტის წინ სარალიძის მხარდასაჭერი აქცია გაიმართა. "ცოცხალი კარავი" — ამ ფორმით აქტივისტებმა სარალიძისთვის შეზღუდული კარვის გაშლის უფლება გააპროტესტეს. აქტივისტები გაუშლელ კარავში ისხდნენ, რომ პოლიიას მისი წაღება ვერ მოეხერხებინა. ისინი კარავში დარჩენენ მაშინაც კი, როცა სხვა პირები მის აწყობას ცდილობდნენ.

აქციის მიმდინარეობისას მოხდა რამდენიმე დაპირისპირება პოლიციასთან, თუმცა კარვები დილამდე პარლამენტის წინ დარჩა. სარალიძის მხარდასაჭერი აქცია გვიან ღამით დასრულდა.

რატომ დააკავეს ზაზა სარალიძე

შინაგან საქმეთა სამინისტროს ინფორმაციით26 ოქტომბერს ზაზა სარალიძე და მასთან ერთად კიდევ ორი პირი პოლიციელზე თავდასხმის ბრალდებით დააკავეს. სარალიძემ სამართალდამცავების მიმართ აგრესია მას შემდეგ გამოხატა, რაც მას პარლამენტის შენობასთან კარვის გაშლის უფლება არ მისცეს.

ეს პირველი შემთხვევა არაა, როცა მას ეს უფლება შეუზღუდეს. სარალიძე თბილისის პარლამენტის შენობასთან უკვე 46 დღეა აქციას მართავს და შვილის მკვლელობაში მონაწილე პირების დაკავებას ითხოვს.

მოგვიანებით შვილმოკლული მამა პოლიციის შენობაში შეუძლოდ გახდა და სასწრაფო სამედიცინო დახმარებამ ინგოროყვას კლინიკაში გადაიყვანა. ექიმის ინფორმაციით მისი ჯანმრთელობის მდგომარეობა სტაბილურია, თუმცა ის საავადმყოფოში რჩება.