თბილისში, ყიფიანის ქუჩაზე, იქ, სადაც რამდენიმე თვის წინ მშენებარე სასტუმროს თავზე კლდე ჩამოიშალა შესაძლოა, სამუშაოები ისევ გაგრძელდეს.

მერიაში აცხადებენ, რომ დასკვნების მიხედვით, ამ ეტაპზე, კლდის ჩამოშლის საფრთხე არ არსებობს და გამაგრების სამუშაოები, რომელიც კომპანიამ ამ დრომდე განახორციელა, სწორადაა შესრულებული. მომზადდა ორი ალტერნატიული დასკვნა: ერთი — მოსახლეობის მიერ წარმოდგენილი კონსტრუქტორ-გეოლოგის, მეორე — კომპანიის მიერ ხელახლა დაქირავებული ახალი ექსპერტების მიერ.

თბილისის მერის მოადგილე ილია ელოშვილი მთაწმინდის რაიონში, ყიფიანის ქუჩაზე 19 ოქტომბერს მივიდა. მაშინ ელოშვილმა განაცხადა, რომ 22 ოქტომბერს გაიმართებოდა შეხვედრა, ყველა მხარის ჩართულობით. მისივე თქმით, სწორედ ამის შემდეგ უნდა გადაწყდეს, რა ფორმით გაგრძელდება აღნიშნულ ტერიტორიაზე მშენებლობა. მერიაში ამბობენ, რომ ჯერ არაა ცნობილი, შედგება თუ არა დღეს ეს შეხვედრა.

"სრული პასუხისმგებლობით ვაცხადებ, რომ ამ დროისთვის, ფერდის ჩამოშლის საფრთხე არ არსებობს. შემდეგი ეტაპი არის ის, თუ რა ფორმით გაგრძელდეს მშენებლობა იმისთვის, რომ არანაირი საფრთხე მოსახლეობისთვის არ არსებობდეს", — განაცხადა ილია ელოშვილმა.

31 მაისს, თბილისში, მამა დავითის ეკლესიასთან კლდის ნაწილი მშენებარე კორპუსს დაეცა.