ქართული ოცნების ოფისთან, პარტიის კრების პარალელურად, მათი მხარდაჭერილი საპრეზიდენტო კანდიდატის, სალომე ზურაბიშვილის საწინააღმდეგო აქცია იმართება. აქციის მონაწილეებს აქვთ ბანერები წარწერებით "არა რუსეთის ჯარისკაცებს" და "არა სალომე ზურაბიშვილს".

ქართული ოცნების ოფისთან შეკრებილები მოითხოვენ ზურაბიშვილთან შეხვედრას. მათი თქმით, საპრეზიდენტო კანდიდატმა მოქალაქეების კითხვებს უნდა გასცეს პასუხი. აქციის მონაწილეები ასევე ითხოვენ გზის სავალი ნაწილიდან გადასვლას და ოფისთან მისვლას, თუმცა სამართალდამცავები მათ ამის უფლებას არ აძლევენ.

ფოტო: კადრი ვიდეოდან / რადიო თავისუფლება

დღეს, პირველ ოქტომბერს ქართული ოცნება საგანგებოდ შეიკრიბა. პარტიის წევრების განცხადებით, შეხვედრას ესწრებიან პრემიერ-მინისტრი, მამუკა ბახტაძე და პარტიის ლიდერი, ბიძინა ივანიშვილი.

პირველი ოქტომბერს ქართული ოცნების საპარლამენტო არჩევნებზე გამარჯვებიდან 6 წელი გავიდა. პარტიის წევრების განცხადებით, შეკრების შემდეგ ოფიციალურ განცხადებას გაავრცელებენ.