რამდენიმე დღის წინ იაპონურმა კოსმოსურმა სააგენტომ, ისტორიაში პირველად, მოძრავ ასტეროიდზე ორი ხომალდი დასვა.

ეს პროცესი ადვილი სულაც არ ყოფილა. ასტეროიდზე როვერების დაშვებამდე მთავარი ხომალდი ჰაიაბუსა2 ასტეროიდ რიუგუს რამდენიმე წლის განმავლობაში უახლოვდებოდა. ახლა კი, როგორც იქნა რიუგუდან პირველი სურათებიც მივიღეთ.

ფოტო: JAXA

მოხტუნავე ფეხებით აღჭურვილი ორი როვერი ჰაიაბუსა2-ს მისიის შესრულებაში დაეხმარება. ჰაიაბუსას მთავარი მიზანი დედამიწაზე ასტეროიდიდან ქვების ნიმუშების ჩამოტანაა. როვერები ასტეროიდს სურათებს სპეციალური კამერებით გადაუღებენ და მასზე ინფორმაციას მოაგროვებენ. მთავარი ხომალდი ჰაიაბუსა2 კი ნიმუშების მოსაგროვებლად ასტეროიდზე ოქტომბრის მეორე ნახევარში დაეშვება.

ჰაიაბუსამ ასტეროიდისკენ მოგზაურობა 2014 წელს დაიწყო და მასთან 2018 წლის ივნისში მივიდა.

ამ დრომდე მიღებული სურათები ცოტათი ბუნდოვანია, რადგან რობოტებმა ისინი მოძრაობის დროს გადაიღეს.

ხომალდი ჰაიაბუსა2 ასტეროიდიდან

ხომალდი ჰაიაბუსა2 ასტეროიდიდან

ფოტო: Jaxa

რიუგუ მინერალების, ყინულისა და ორგანული ნაერთებისგან შედგება. იაპონური კოსმოსური სააგენტო იმედოვნებს, რომ ასტეროიდის შესწავლით ისინი მზის სისტემის შიდა პლანეტებისა და ორგანული ნაერთების ფორმირების პროცესს ამოხსნიან.

ფოტო: Jaxa

იაპონური კოსმოსური სააგენტო აცხადებს, რომ ასტეროიდზე დაშვებული ორივე ხომალდი კარგ მდგომარეობაშია. სურათებით კი დადასტურდა, რომ ისინი ასტეროიდის ზედაპირზე წარმატებით გადაადგილდებიან. ერთ-ერთ ახალ სურათში თავად ხომალდის ანტენის ჩრდილი და როვერის სხვა დეტალები ჩანს.

ჰაიაბუსა2 ასტეროიდის გარშემო ერთ წელს გაატარებს, შემდეგ კი სახლისკენ გამოემართება, გზას სავარაუდოდ ერთი წელი დასჭირდება.

ფოტო: Jaxa