"ახალი წელი, ახალი მეს" კონცეფციაზე მუშაობა დანკინ დონატსმა ჯერ კიდევ შემოდგომიდან დაიწყო და როგორც განაცხადა, 2019 წლის იანვრიდან სახელს შეიცვლის.

ეს იმას ნიშნავს, რომ დანკინ დონატსი უბრალოდ დანკინი გახდება და ყველა რეკლამიდან, შეფუთვიდან თუ აბრიდან სახელსა და ლოგოს Dunkin' Donuts-ს მხოლოდ Dunkin'-ით ჩაანაცვლებს. რებრენდინგი, პირველ რიგში, ამერიკაში განხორციელდება.

ფოტო: Dunkin' Donuts

დანკინის ბრენდის აღმასრულებელმა დირექტორმა დევიდ ჰოფმანმა განაცხადა, რომ რებრენდინგი კომპანიის ზრდის და იმ ცვლილებების ნაწილია, რომელსაც მომხმარებლებს ეტაპობრივად სთავაზობენ.

დანკინის ტვიტერზე სახელი და ბიოგრაფია უკვე შეიცვალა და ახალი სახელის სარეკლამო რგოლიც გამოჩნდა:

"ოფიციალურად ჩვენი სახელი დანკინი ხდება. 68-წლიანი სლოგანის, America running on Dunkin'-ის შემდეგ, გადავწყვიტეთ, მხოლოდ პირველი სახელი დავიტოვოთ. სიხარულით ვინარჩუნებთ საუკეთესო მეგობრის სტატუსს".

კალიფორნიის შტატში მდებარე ქალაქ პასადენაში, დანკინ დონატსის რესტორანზე შეცვლილი სახელი და ლოგო უკვე გამოჩნდა.

ფოტო: Jessica Tyler / Business Insider

როგორც ვისოლ ჯგუფის საზოგადოებასთან ურთიერთობის მენეჯერმა On.ge-ს უთხრა, დევიდ ჰოფმანის დირექტივით, დანკინის სახელი და ლოგო საქართველოში, ისე როგორც სხვა ქვეყნებში, უახლოეს წლებში შეიცვლება.

დანკინ დონატსი 1950 წელს მასაჩუსეტსის შტატში, ქალაქ ქუინსიში უილიამ როზენბერგმა გახსნა. ამ დროისთვის, დანკინს 46 ქვეყანაში 12 600-ზე მეტი რესტორანი აქვს და წლიურად, მსოფლიო მასშტაბით 2,9 მილიარდზე მეტ დონატს ყიდის.

წიგნების გამომცემელი ამერიკული კომპანია მერიამ-ვებსტერი სიტყვა Donuts-ის პოპულარიზაციასა და მის ლექსიკონში შეტანაზე დანკინ დონატსის დამსახურებას აღნიშნავს, რადგან კომპანიამ ტრადიციული doughnut-ის ნაცვლად donuts-ის გამოყენებაში გადამწყვეტი როლი ითამაშა.