მოძრაობა ძალა ერთობაშიას ლიდერები საქართველოს კონსტიტუციით ნარკოტიკული საშუალებების წარმოების აკრძალვას ითხოვენ. შესაბამისი საკონსტიტუციო ცვლილებების პროექტი მოძრაობის ლიდერებმა პარლამენტში უკვე შეიტანეს. პროექტით, პირადი მოხმარებისთვის კულტივირება აკრძალული არ არის.

კანაფის კულტივაციისა და ექსპორტის კონსტიტუციით აკრძალვის მიზნით გაერთიანებული ოპოზიცია ხელმოწერების შეგროვებას იწყებს. გაერთიანების ლიდერები მოითხოვენ, რომ 200 ათასი ხელმოწერის შეგროვების შემდეგ კონსტიტუციაში ცვლილებები შევიდეს, რაც მარიხუანას კულტივაციისა და ექსპორტის კონსტიტუციით აკრძალვას განაპირობებს.

შემდეგი პროცედურა საკითხის ბიუროს სხდომაზე გატანაა, ამის შემდეგ კი საპროცედურო კომიტეტმა გაერთიანებული ოპოზიციის წევრებს სპეციალური ბლანკები უნდა გადასცეს, რომელზეც ხელმოწერები შეგროვდება.

ზოგადად ნარკოტიკებისა და არა წარმოების, კონსტიტუციით აკრძალვის საჭიროებაზე მართლმადიდებელი ეკლესიის სასულიერო პირები საუბრობდნენ. მარიხუანის მოხმარების რეგულირების კანონპროექტის განხილვისას ერთ-ერთმა სასულიერო პირმა პარლამენტის იურიდიულ საკითხთა კომიტეტის თავმჯდომარეს ეკა ბესელიას უსაყვედურა. მისი თქმით, პარლამენტს რომ ეკლესიის აზრი გაეთვალისწინებინა და ნარკოტიკული ნივთიერებები კონსტიტუციით აერძალა, კანაფის კულტივაციის კანონპროექტი არ შემუშავდებოდა.