პანკისობა 2018 მალხაზ მაჩალიკაშვილის ოჯახის პროტესტის გამო დროზე ადრე დასრულდა. ამის შესახებ კახეთის გუბერნატორმა, ირაკლი ქადაგიშვილმა რადიო თავისუფლებას განუცხადა.

სპეცოპერაციის დროს დაღუპული თემირლან მაჩალიკაშვილი მამა, მალხაზ მაჩალიკაშვილი და მისი ოჯახი სოფელ დუისში ღონისძიების ჩატარებას აპროტესტებდა. მათი თქმით, როდესაც თემირლანის გარდაცვალების საქმე გამოძიებული არ არის ხეობაში მსგავსი ღონისძიების ჩატარება არ შეიძლება. აქციის მონაწილეებს გზა ჰქონდათ გადაკეტილი. On.ge-მ სცადა მალხაზ მაჩალიკაშვილთან დაკავშირება, თუმცა მას ტელეფონი აქვს გათიშული.

Reginfo-ს ინფორმაციით, აქციის დროს ინციდენტის მოხდა. როგორც გამოცემა წერს, ბავშვებს კორდონი ჰქონდათ გაკეთებული და იმ ადგილისკენ, სადაც ღონისძიება უნდა ჩატარებულიყო არავის უშვებდნენ. კორდონის გარღვევა სცადა ავტომობილის მძღოლმა, რის შედეგადაც ბავშვები მსუბუქად დაშავდნენ.

On.ge-ს შინაგან საქმეთა სამინისტროს პრესსამსახურმა განუცხადა, რომ მძღოლი პოლიციის განყოფილებაშია გადაყვანილი. გამოძიება კი სისხლის სამართლის კოდექსის 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

2017 წლის 21-22 ნოემბრის ისნის სპეცოპერაციის შედეგად სუს-მა დააკავა დანაშაულებრივი ჯგუფის ერთი პირი და სამი წევრის ლიკვიდირება მოახდინა. რამდენიმე კვირის შემდეგ, 26 დეკემბერს, პანკისში, ახმედ ჩატაევთან და მის თანამზრახველებთან კავშირის ბრალდებით რუსლან ალდამოვთან ერთად ოთხი პირი დააკავეს. სახელმწიფო უსაფრთხოების სამსახურის ინფორმაციით, თემირლან მაჩალიკაშვილმა დაკავებისას წინააღმდეგობის გაწევა და ხელყუმბარის გამოყენება სცადა, რის გამოც სპეცრაზმელებმა მას ესროლეს. მაჩალიკაშვილმა სასიკვდილო დაზიანება თავის არეში მიიღო. მაჩალიკაშვილის ოჯახი სუს-ის ვერსიას არ იზიარებს და ამბობს, რომ თემირლანი მოკლეს.