საერთაშორისო გამჭვირვალობა - საქართველომ, სტრასბურგის ადამიანის უფლებათა დაცვის ევროპული სასამართლოსთვის, რუსეთის ხელისუფლების წინააღმდეგ სარჩელი მოამზადა, რომლის მიხედვით, 11 ოჯახისთვის უნდა მოხდეს საკუთრების უფლების უზრუნველყოფა.

საუბარია 2008 წლის რუსეთ-საქართველოს ომის დროს და ასევე ომის შემდეგ, მცოცავი ოკუპაციის შედეგად დევნილად ქცეულ ადგილობრივთა კუთვნილ ქონებაზე, რომელიც მათ დაკარგეს.

იურისტმა თეო ზაქარაშვილმა On.ge-სთან საუბარში სასარჩელე მოთხოვნებზე ისაუბრა. მისი თქმით, ამ საჩივრით საერთაშორისო გამჭვირვალობას საქართველოს 11 მოქალაქის სახელით შეაქვს სარჩელი, სადაც საქმე ეხება მათი საკუთრების უფლების დაცვასა და უზრუნველყოფას:

"კერძოდ, ის რომ რეალურად ისინი თავიანთი საკუთრებით ვეღარ სარგებლობენ, ვეღარ შედიან თავიან სახლებში, დაატოვებინეს მიწები, ვეღარ მიდიან თავიანთი ახლობლების საფლავზე და ა.შ. ამის უფლებას მათ არ აძლევს რუსეთის საოკუპაციო რეჟიმი".

თეო ზაქარაშვილის თქმით, სხვადასხვა სოფლიდან, სხვადასხვა კატეგორიის შემთხვევები შეირჩა იქედან გამომდინარე, რომ ყველა მათგანზე იმსჯელოს სასამართლომ:

"მათ შორის არის ისეთი, რომელიც ე.წ. მეორადი ოკუპაციის დროს დაზარალდა, ანუ სინამდვილეში აგვისტოს ომის დროს მათ არ დაუკარგავთ თავიანთი საკუთრება, მაგრამ მას შემდეგ რაც საზღვრის რამდენჯერმე გადმოწევა მოხდა, დაკარგეს ბაღები და სახნავ სათესი მიწები".