დღეს, 12 სექტემბერს ქართული ოცნების მხარდაჭერილი პრეზიდენტობის კანდიდატის, სალომე ზურაბიშვილის საარჩევნო კამპანია ქუთაისში პროტესტის ფონზე დაიწყო. მოძრაობა "ძალა ერთობაშიას" წევრები მესხიშვილის თეატრთან მივიდნენ ბანერებით და შეძახილებით: "სალომე გამოდი, უთხარი ქვეყანას სათქმელი", "ოკუპანტები შორს ქართული მიწიდან, საქართველოს გაუმარჯოს".

დემონსტრანტებს ბანერზე ვლადიმერ პუტინისა და სალომე ზურაბიშვილის ფოტოები ჰქონდათ გამოსახული.

აქციის ერთ-ერთი მონაწილის თქმით, ადამიანი, რომელიც იმეორებს იმას, რომ საქართველომ დაბომბა მძინარე ცხინვალი, ჯაშუში და პუტინის მონაა.

დღეს, ქუთაისში სალომე ზურაბიშვილი მხარდამჭერებს ლადო მესხიშვილის სახელობის თეატრში შეხვდა.

გუშინ, 11 სექტემბერს საქართველოს პრეზიდენტობის კანდიდატმა სალომე ზურაბიშვილმა, ტოკ-შოუ რეაქციაში 2008 წლის ომზე კიდევ ერთხელ ისაუბრა და განაცხადა, რომ ქართულმა მხარემ თავისი მოსახლეობა დაბომბა.

"ჩვენ დავბომბეთ ჩვენი მოსახლეობა, რისი უფლებაც არც ერთ პრეზიდენტს არ გააჩნია. ჩვენ მეორე დღეს როგორ უნდა ვთქვათ, რომ ამ ქვეყნის მთლიანობა გვინდა? მე მინდა მთლიანობა ამ ქვეყნის და არ მინდა, რომ პრეზიდენტმა დაბომბოს თავისი ტერიტორია და ქალაქები", - განაცხადა სალომე ზურაბიშვილმა.