საქართველოს პრეზიდენტობის კანდიდატი, დავით ბაქრაძე მიიჩნევს, რომ 2008 წლის აგვისტოს ომის საქართველოსთვის დაბრალება რუსული პროპაგანდის ნაწილია. ასე გამოეხმაურა ის მმართველი პარტიისგან მხარდაჭერილი პრეზიდენტობის კანდიდატის, სალომე ზურაბიშვილის განცხდებას.

"მშვიდობიანი მოსახლეობის დაბომბვა, ადამიანების განდევნა და ეთნიკური წმენდა არის დადასტურებული დანაშაული, რომელიც ჩაიდინა რუსეთის ფედერაციამ საქართველოს ტერიტორიაზე, ამიტომ ამ დანაშაულის საქართველოსთვის გადმობრალება და რუსული პროპაგანდის ტექსტის პირდაპირ გამეორება, კიდევ ერთხელ ადასტურებს,რომ ქალბატონი ზურაბიშვილის პრეზიდენტად არჩევა შეიცავს პირადპირ საფრთხეს ქართული სახელმწიფო ინტერესისთვის და ძალიან დიდი იმედი მაქვს, ქართული საზოგადოება არ დაუშვებს საქართველოს პრეზიდენტი იყოს ადამიანი, რომელიც არამხოლოდ ომის დაწყებას აბრალებს საკუთარ ქვეყანას, არამედ პირდაპირ იმეორებს რუსულ პროპაგანდას," — განუცხადა რუსთავი 2-ს დავით ბაქრაძემ.

საქართველოს პრეზიდენტობის კანდიდატმა სალომე ზურაბიშვილმა, რომელსაც მხარს ქართული ოცნება უჭერს, ტოქ-შოუ რეაქციაში 2008 წლის ომზე კიდევ ერთხელ ისაუბრა და განაცხადა, რომ ქართულმა მხარემ თავისი მოსახლეობა დაბომბა, რაც ფაქტებითაა დასაბუთებული.

"ჩვენ დავბომბეთ ჩვენი მოსახლეობა, რისი უფლებაც არც ერთ პრეზიდენტს არ გააჩნია. ჩვენ მეორე დღეს როგორ უნდა ვთქვათ, რომ ამ ქვეყნის მთლიანობა გვინდა? მე მინდა მთლიანობა ამ ქვეყნის და არ მინდა, რომ პრეზიდენტმა დაბომბოს თავისი ტერიტორია და ქალაქები", - განაცხადა სალომე ზურაბიშვილმა.