ოსკარის მფლობელმა კეტრინ ზეტა-ჯონსმა ფეისბუქთან კონტრაქტი გააფორმა, რომლის მიხედვითაც, ის სოციალური ქსელის მიერ გადაღებულ სერიალში, Queen America, მთავარ როლს შეასრულებს.

სერიალის პირველი სეზონი 10 ეპიზოდიანი იქნება და მისი ხანგრძლივობა ერთი საათია. შოუ შავი კომედიის ჟანრისაა და მას ოკლაჰომას შტატში გადაიღებენ. ზეტა-ჯონსი სერიალში ვიკი ელისის როლს შეასრულებს. ის გოგოებს სილამაზის კონკურსისთვის ამზადებს და პირველ სეზონში მისი მიზანი სამანტა სტოუნის სილამაზის დედოფლად ქცევა იქნება.

Facebook-მა რამდენიმე თვის წინ განაცხადა, რომ საკუთარი სერიალების გადაღებას იწყებდა, რომლის თითო ეპიზოდშიც მინიმუმ $3 მილიონს ჩადებდა.

პროექტი უკვე საწყის ეტაპზეა. კეტრინ ზეტა-ჯონსის სერიალის გარდა, Facebook-მა ელიზაბეტ ოლსენის მონაწილეობით ახალი სერიალი დააანონსა.

აღსანიშნავია, რომ ფეისბუქი გეგმავს, გადაიღოს ნორვეგიული სერიალის, Skam, ინგლისურენოვანი ადაპტაცია.

ფეისბუქი აპირებს, ამაზონისა და ნეტფლიქსის მსგავსი პლატფორმა შექმნას ვებ-სერიალებისათვის. 10 და 30-წუთიანი სერიალების გარდა, სრულმეტრაჟიან სერიალებსაც უნდა ველოდოთ.