16 სექტემბერს, ხანგრძლივი ლოდინის შემდეგ სახელოვნებო კომპანია ღია სივრცე გაიხსნება.

ღია სივრცე, ეს არის სახელოვნებო კომპანია, რომელიც მიზნად ისახავს საქართველოში ვიზუალური და საშემსრულებლო ხელოვნების განვითარებას. ორგანიზაციის მიერ შემუშავებული პროგრამა აერთიანებს ქართველ და საერთაშორისო არტისტებს და ხელოვნებით დაინტერესებულ პირებს, არის ინტერდისციპლინარული და იძლევა ხელოვნების სხვადასხვა დარგში სინთეზურად მუშაობის შესაძლებლობას.

კომპანიის მიზანია აღმოაჩინოს არტისტები და მისცეს მათ პროფესიული უნარ-ჩვევების განვითარების, თვითგამოხატვისა და ერთმანეთთან დაკავშირების შესაძლებლობა, შექმნას გარემო სრული შემოქმედებითი თავისუფლებისა და თვითრეალიზების მეთოდების შეუზღუდავობისთვის. ორგანიზაციის ინტერესებშია, რომ მსურველებს შესთავაზოს მრავალფეროვანი საგანმანათლებლო პროგრამა. მოწვეული ხელოვანები, კურატორები და გალერისტები რეგულარულად ჩაატარებენ ლექციებისა და უორქშოფების სერიებს. საგამოფენო სივრცეში იგეგმება ახალგაზრდა ქართველი და საერთაშორისო ხელოვანების თემატური გამოფენების ორგანიზება.

ღია სივრცის თეატრალური ლაბორატორია მიმართულია ახალი ხერხების, მეთოდების, ფორმების კვლევისკენ და გზას უხსნის არტისტებს, რომლებსაც სურთ არაკლასიკური თეატრალურ პროცესის შექმნა ალტერნატიულ სივრცეში. საშემსრულებლო ხელოვნების გარდა ლაბორატორია იმუშავებს საგანმანათლებლო მიმართულებით, რაც მოიცავს ოურქშოპებს, მასტერკლასებს, სპეციალური ლიტერატურის შექმნას/თარგმნას და გამოცემას.

ღია სივრცის შემოქმედებითი ჯგუფი, რომელიც სხვადასხვა მიმართულების არტისტებისგან შეგდება აქტიურად რეაგირებს ქვეყანაში მიდინარე სოციალურ და პოლიტიკურ მოვლენებზე. სპექტაკლები - შიმშლის ღმერთი, წუხილი, პერფორმანსები: შრომის კოდექსი/კლასგარეშე საკითხავი და ანდრო დადიანის უფრო სქელი კანი სწორედ იმ პრობლემებზე ამახვილებს მაყურებლის ყურადღებას, რომლებიც დღეს ჩვენს გარშემო ყველაზე მძაფრად დგას: სიღატაკე, უსახლკარობა, მშრომელთა უფლებების უგულებელყოფა, ჰომოფობია, სხვადასხვა სახის ძალადობა და ამის ფონზე ადამიანები თავიანთი პირადი ცხოვრებით.

არსებობიდან 2 წლის განმავლობაში კომპანიამ მოახერხა შეეძინა საკუთარი მაყურებელი და დაეკავებინა ადგილი კულტურულ პროცესებში, როგორც აქტივისტურ დაჯგუფებას, რომლისთვისაც თეატრი ადამიანის უფლებებისთვის ბრძოლის იარაღია.

16 სექტემბერს, ღია სივრცის გახსნაზე მისულ ადამიანებს, 18:00 საათიდან ელოდებათ პერფორმანსების ჩვენება და ინსტალაციები. 21:00 საათზე კი გაიმართება მუსიკალური ივენთი, რომელშიც სამი თანამედროვე ქართველი ელექტრონული მუსიკოსი ბაკურ მეტრეველი, ირაკლი შონია, სანდრო კოზმანაშვილი თავიანთი საერთო პროექტით FEAR POLLUTION მიიღებს მონაწილეობას.