საერთაშორისო გამჭვირვალობა — საქართველოს კვლევის თანახმად, ღია მმართველობის პარტნიორობის (OGP) გლობალური სამიტის ორგანიზებისთვის, სულ მცირე, 1 780 000 მლნ ლარი დაიხარჯა. მათივე თქმით, ამ თანხის უდიდესი ნაწილი მთავრობის სარეზერვო ფონდიდან გამოიყო, რაც ეწინააღმდეგება როგორც სარეზერვო ფონდის დანიშნულებას, ასევე თავად ღია მმართველობის პარტნიორობისა (OGP) და კარგი მმართველობის პრინციპებს.

ღია მმართველობის პარტნიორობა (OGP) ღია, გამჭვირვალე და ანგარიშვალდებული მმართველობის ჩამოსაყალიბებლად მრავალმხრივ რეფორმებს გულისხმობს. საქართველომ, როგორც ინიციატივის თავმჯდომარე ქვეყანამ, მის გლობალური სამიტს 2018 წლის 17-19 ივლისს უმასპინძლა.

როგორც კვლევაში ვკითხულობთ, სამიტის ორგანიზების ფარგლებში იუსტიციის სამინისტრომ 1 491 466 ლარის ღირებულების 60 ხელშეკრულება, პარლამენტმა 271 374 ლარის ღირებულების 39 ხელშეკრულება გააფორმა, ხოლო თბილისის მერიამ 19 098 ლარი დახარჯა.

საქართველოში ღია მმართველობის პარტნიორობის ინიციატივას წარმართავს და კოორდინაციას უწევს იუსტიციის სამინისტრო. ორგანიზაცია განმარტავს, მთავრობისა და იუსტიციის სამინისტროსთვის სამიტამდე სულ მცირე 9 თვით ადრე, 2017 წლის სექტემბერში, უკვე ცნობილი იყო, რომ საქართველო ღია მმართველობის პარტნიორობის თავჯდომარე ქვეყანა ხდებოდა და სამიტის მომავალი მასპინძელიც ის იქნებოდა.

TI კვლევაში აღნიშნავს, რომ სახელმწიფო ბიუჯეტის, მათ შორის, იუსტიციის სამინისტროს ბიუჯეტის საბოლოო ვარიანტი დეკემბერში მტკიცდება. ბიუჯეტის პირველადი პროექტი პარლამენტს არაუგვიანეს პირველი ოქტომბრისა წარედგინება, ხოლო პროექტის საბოლოო ვერსია არა უგვიანეს 30 ნოემბრისა წარედგინება პარლამენტს:

"შესაბამისად, სამიტის სათანადო დაგეგვმისათვის არსებობდა გონივრული ვადა, რაც ორგანიზებისთვის საჭირო თანხის იუსტიციის სამინისტროს 2018 წლის ბიუჯეტში გათვალისწინების საშუალებას იძლეოდა".

კვლევაში ვკითხულობთ, რომ 2018 წლის ივლისში სამიტის ორგანიზებისთვის საჭირო 1 660 000 მლნ ლარი მთავრობამ იუსტიციის სამინისტროს სარეზერვო ფონდიდან გამოუყო. საბიუჯეტო კოდექსის თანახმად, მთავრობის სარეზერვო ფონდიდან სახსრები გამოიყოფა სახელმწიფო ბიუჯეტით გაუთვალისწინებელი გადასახდელების დასაფინანსებლად.

"ღია მმართველობის პარტნიორობის გლობალური სამიტის ორგანიზება კი, როგორც უკვე ითქვა, შეიძლებოდა გათვალისწინებული ყოფილიყო იუსტიციის სამინისტროს 2018 წლის ბიუჯეტში".

საერთაშორისო გამჭვირვალობა — საქართველო აღნიშნავს, რომ წინასწარვე ცნობილი მოსალოდნელი ხარჯების სარეზერვო ფონდიდან დაფინანსება ბიუჯეტის დაგეგმვის ცუდი პრაქტიკაა და ეწინააღმდეგება სარეზერვო ფონდის დაფინანსების გამოყენების არსს. ამასთან, სარეზერვო ფონდიდან გამოყოფილი თანხის ხარჯვაზე არ ვრცელდება "სახელმწიფო შესყიდვების შესახებ" კანონის მოთხოვნები და ამ სახსრებით განხორციელებული შესყიდვები ტენდერის გზით არ მიმდინარეობს.

სამიტის ორგანიზებისთვის იუსტიციის სამინისტროს მიერ დახარჯული 1 491 466 ლარის ფარგლებში დადებული, ყველაზე მსხვილი ხელშეკრულებებია:

ორგანიზაცია აღნიშნავს, რო სამიტის ხარჯების სამინისტროს ბიუჯეტში გათვალისწინების შემთხვევაში, ზოგიერთი მნიშვნელოვანი და მსხვილი შესყიდვა ტენდერის გზით, კონკურენტულ პირობებში განხორციელდებოდა.

"ამით საბიუჯეტო სახსრების უფრო ეკონომიურად და ეფექტიანად ხარჯვის შესაძლებლობა გაჩნდებოდა. ამავე დროს, შესყიდვის პროცესი გამჭვირვალე, შესყიდვებთან დაკავშირებული ინფორმაცია კი ელექტრონულად ხელმისაწვდომი იქნებოდა, რისი უზრუნველყოფაც ღია მმართველობის პარტნიორობის ერთ-ერთ მთავარ მიზანს წარმოადგენს".