თბილისის მერიის განცხადებით, კუს ტბის საბაგირო გზის რეაბილიტაცია სექტემბრის პირველ ნახევარში დასრულდება, მათივე თქმით, ჭავჭავაძის გამზირიდან კუს ტბაზე მოხვედრა 6 წუთში იქნება შესაძლებელი.

რამდენიმე თვეა კუს ტბის საბაგიროს რეაბილიტაცია მიმდინარეობს. მშენებლობას კომპანია ბაგირმშენი ახორციელებს. მერიის განმარტებით, ამ ეტაპზე შეიცვალა გამწევი ბაგირი. დამონტაჟდა საბაგირო გზის მართვის პულტი:

"კუს ტბის საბაგირო გზაზე თბილისელებს და დედაქალაქის სტუმრებს ორი გონდოლა მოემსახურება. თითო გონდოლით 10-12 ადამიანი შეძლებს მგზავრობას, მათ შორის, ერთი მუდმივი გამცილებელი. გონდოლები შეზღუდული შესაძლებლობის პირთათვის ადაპტირებული იქნება. ველოსიპედის მოყვარულთათვის კი სპეციალური ველო-საკიდებია დამონტაჟებული. გონდოლები კაპიტალურად გარემონტდა, თუმცა ძველი იერსახე შეუნარჩუნდა".

ფოტო: თბილისის მერია

მერია აცხადებს, რომ კუს ტბის საბაგირო გზა გახსნამდე სატესტო რეჟიმში ამუშავდება და კონტროლს საქართველოს ეკონომიკის სამინისტროს ტექნიკური და სამშენებლო ზედამხედველობის სამსახური გაუწევს:

"სექტემბრის პირველ ნახევარში საბაგირო გზა ოფიციალურად გაიხსნება და დღის განმავლობაში საშუალოდ 2000-მდე მგზავრს მოემსახურება. კუს ტბის საბაგირო ზაფხულის თვეებში დილის 08:00 საათიდან ღამის 00:00 საათამდე იმუშავებს, ზამთარში კი დილის 08:00-0 საათიდან ღამის 10:00 საათამდე".

თბილისის მერიის განცხადებით, კუს ტბის საბაგირო გზის რეაბილიტაციისთვის დედაქალაქის ბიუჯეტიდან 1 100 000 ლარი დაიხარჯება.