ქართული ოცნების პოლიტსაბჭოს წევრმა მამუკა მდინარაძემ 2030-ის ეთერში განაცხადა, რომ ქორწინების განსაზღვრის შესახებ რეფერენდუმის დანიშვნის საკითხი მომავალმა პარლამენტმა უნდა განიხილოს. მისივე თქმით, ქართველი ხალხის აზრი საკანონმდებლო ორგანომ უნდა გაითვალისწინოს:

"ნამდვილად ვერ ვიტყვი, რომ ეს იქნებოდა საუკეთესო გადაწყვეტილება, მაინც და მაინც დღეს ხვალ ერთი თვის მერე თუ არჩევნების პერიოდში დანიშნულიყო ეს რეფერენდუმი, მაგრამ აქვე უნდა აღვნიშნო რომ ქართული ოცნების წარმომადგენლებმა გააკეთეს განცხადებები, გარკვეული მზაობაც იყო, იქ კვორუმის პრობლემაც იყო. ამ საკითხთან დაკავშირებით შემდეგმა პარლამენტმა უნდა იმსჯელოს, რაც თავისთავად შეიძლება მოხდეს და ამას რეფერენდუმი აღარ სჭირდება. სინამდვილეში ქართველი ხალხი ერთ აზრზეა და მე ვფიქრობ ქართველი ხალხის აზრი უნდა გაითვალისწინოს საქართველოს პარლამენტმა".

ინიციატივასთან დაკავშირებით პრეზიდენტმა გიორგი მარგველაშვილმა თქვა, რომ რეფერენდუმის ჩატარების საფუძველი არ არსებობს:

"მასში წარმოდგენილი ფორმულირება არ ექვემდებარება რეფერენდუმს, ვინაიდან ეს საკითხი უკვე გადაწყვეტილია ქართულ კანონმდებლობაში და დადგენილია, რომ ქორწინება ოჯახის შექმნის მიზნით ქალისა და მამაკაცის ნებაყოფლობითი კავშირია".