საინიციატივო ჯგუფმა დავით ჯანდიერის ხელმძღვანელობით პარლამენტის ბიუროს სასამართლო სისტემის რეფორმირების თაობაზე კანონპროექტის მხარდასაჭერად ხელმოწერები წარუდგინა.

მოძრაობა სახელმწიფო ხალხისთვის მიერ მომზადებული კანონპროექტი მიზნად ისახავს იუსტიციის უმაღლესი საბჭოს მოქმედი შემადგენლობის დათხოვნას და საბჭოს ახალი შემადგენლობის არჩევას, ასევე იცვლება მოსამართლეთა დისციპლინური პასუხისმგებლობის საფუძვლები და პროცედურა.

დავით ჯანდიერმა დღესვე პარლამენტის თავმჯდომარეს მიმართა თხოვნით ბიუროს რიგგარეშე სხდომის მოწვევის შესახებ. მისი განცხადებით, პარლამენტში 35-ზე მეტი ხელმოწერა შეიტანეს სასამართლო სისტემის რეფორმის მხარდასაჭერად:

"პარლამენტის თავმჯდომარეს, მას შემდეგ რაც გაივლის საპროცედურო საკითხთა კომისიას, მივმართავთ თხოვნით, ბიუროს რიგგარეშე სხდომის მოწვევის შესახებ. არავითარი აზრი არჩევნების ჩატარებას ამ სასამართლო სისტემით აზრი არა აქვს. გამოჩნდება რამდენად სურს ხელისუფლებას სასამართლოში არსებული მდგომარეობის გაუმჯობესება. ეს იქნება ტესტი, თუ როგორ პასუხობს ხელისუფლება ხალხის ხმას."