აშშ-ის პრეზიდენტის შვილი, ივანკა ტრამპი ჯონ მაკკეინის გარდაცვალებასთან დაკავშირებით მწუხარებას გამოთქვამს. მისი თქმით, მსოფლიო გლოვობს ნამდვილი გმირის დაკარგვას.

"მინდა, ღრმა სიმპათიები გამოვხატო სენატორ ჯონ მაკკეინის მიმართ. ჯონ მაკკეინი იყო ამერიკელი პატრიოტი, რომელიც ჩვენს ქვეყანას 60 წელზე მეტი ემსახურებოდა. სრულიად ერი გაერთიანდა მწუხარების გარშემო", - განაცხადა ივანკა ტრამპმა NBC News-ის ეთერში.

ივანკა ტრამპისგან განსხვავებით, დონალდ ტრამპი მოკლე და მშრალი განცხადებით შემოიფარგლა. როგორც The Washington Post წერს, პრეზიდენტმა მაკკეინის გარდაცვალებასთან დაკავშირებით თეთრ სახლს განცხადების გავრცელება აუკრძალა და ადმინისტრაციისგან მომზადებული წერილი, სადაც სენატორი გმირად იყო მოხსენიებული შეცვალა და მოკლე განცხადება გაავრცელა:

"ჩემი ღრმა მწუხარება და პატივისცემა სენატორ ჯონ მაკკეინის ოჯახს. ჩვენი გულები და ლოცვა თქვენთანაა!"

გლოვის ნიშნად აშშ-ის სახელმწიფო დაწესებულებზე სახელმწიფო დროშა შაბათ-კვირას იყო დაშვებული. ორშაბათს კი დროშები ისევ აღმართეს, რის გამოც დონალდ ტრამი მწვავე კრიტიკის ქვეშ მოყვა. ამის შემდეგ კი პრეზიდენტმა მაკკეინის დაკრძალვამდე დროშების დაშვების განკარგულება გასცა.

აშშ-ის რესპუბლიკელი სენატორი ჯონ მაკკეინი 81 წლის ასაკში 25 აგვისტოს გარდაიცვალა. 2017 წელს მაკკეინის აგრესიული ფორმის კიბოს დიაგნოზი დაუსვეს და სასწრაფო ოპერაცია გაუკეთეს. გარდაცვალებამდე ერთი დღით ადრე მისმა ოჯახმა განცხადა, რომ სენატორი მკურნალობას წყვეტდა.

ჯონ მაკკეინი დონალდ ტრამპის მწვავე კრიტიკოსი იყო. სენატორი პრეზიდენტს მიგრანტების მიმართ დამოკიდებულებისა და პოლიტიკის გამო აკრიტიკებდა.

ერთ-ერთი გამოსვლის დროს დონალდ ტრამპმა განაცხადა, რომ მაკკეინს გმირად არ მიიჩნევდა:

"ის გმირი არაა, ის ხომ ტყვედ ჩავარდა. მე უფრო მომწონს ხალხი, რომელიც ტყვედ არ ვარდება".

სწორედ ჯონ მაკკეინმა შეუშალა ხელი დონალდ ტრამპს, რომ ჯანდაცვის საკითხებზე "ობამაქეარის" სახელით ცნობილი კანონი გაეუქმებინა. სენატში რესპუბლიკელებს 100-დან 52 სკამი ეკავათ და კანონის გასაუქმებლად 50 ხმა ჰყოფნიდათ.

ჯონ მაკკეინი, რომელსაც ტვინზე ოპერაცია ახალი გადატანილი ჰქონდა, კაპიტოლიუმში მივიდა და დემონსტრაციულად არ დაუჭირა მხარი ტრამპის ჩანაფიქრს, რითაც ობამას მემკვიდრეობა შეინარჩუნა.

ცნობილია, რომ სენატორის სუვილისამებრ მისი დაკრძალვის ცერემონიას ყოფილი პრეზიდენტები ბარაკ ობამა და ჯორჯ ბუში უმცროსი დაესწრებიან. ასევე, მისივე თხოვნით ცერემონიას არ დაესწრება დონალდ ტრამპი.