როცა საქმე რეკლამას ეხება, [იმედია] ყველამ იცის, რომ თვალისმომჭრელი გამოსახულების დიდი ნაწილი გაზვიადებული და დადგმულია, თუმცა, მომხმარებელი კომპანიებისგან ცოტაოდენ გულწრფელობას მაინც ელის.

განსაკუთრებით იმ ეპოქაში, რომელშიც "მობილური ფოტოგრაფია" ახალი მიმდინარეობაა და სმარფტონებმა ციფრული კამერების დიდი ნაწილი ჩაანაცვლეს.

თუმცა, რაც არ უნდა კარგი და საოცარი იყოს იყოს მობილურით გადაღებული კადრები, ის ისეთი მაღალი ხარისხის მაინც ვერ იქნება, როგორსაც ციფრული ერთლინზიანი რეფლექტორული კამერა (DSLR) იღებს და ეს კარგად იცის ტექნოლოგიურმა კომპანია Huawei-მ.

Reddit-ის მომხმარებელმა აღმოაჩინა, რომ ჰუავეიმ nova 3-ის რეკლამაში სწორედ DSLR-ით გადაღებული კადრები გამოიყენა.

რეკლამაში წყვილს ვხედავთ, რომელიც სხვადასხვა სიტუაციაში იღებს სელფს. ის გვიჩვენებს, რომ ჰუავეის წინა კამერა იმდენად კარგ სურათებს იღებს, რომ მასში მონაწილე ქალს მაკიაჟის გაკეთებაც კი არ სჭირდება.

რეკლამაში მონაწილე მსახიობმა სარა ელშეიმიმ ინსტაგრამზე ფოტო დადო, რომელშიც ჩანს, რომ სურათებს ჰუავეით კი არა, ციფრული კამერით პროფესიონალი ფოტოგრაფი იღებდა. მოგვიანებით, მან ფოტო ინსტაგრამიდან წაშალა, თუმცა, ალბათ არ გაგიკვირდებათ, რომ მისი სქრინი არსებობს.

Huawei nova 3 ცოტა ხნის წინ გამოვიდა გაყიდვაში და მისი ფასი 501 დოლარიდან იწყება. კომპანიის სასარგებლოდ შეიძლება ითქვას, რომ მას განცხადება არ გაუვრცელებია, რომელშიც ამტკიცებდა, რომ რეკლამაში ნაჩვენები ფოტოები მისი ახალი მოდელით იყო გადაღებული.

ეს პირველი შემთხვევა არაა, რაც ჰუავეი რეკლამაში კადრების გაყალბებაში გამოიჭირეს. Huawei P 9-ს გამოსვლისას, კომპანიამ მობილურით გადაღებული ფოტოები თავის ოფიციალურ გვერდებზე ატვირთა, მათ შორის Google+-ზე. საიტზე, ფოტოს აღწერაში გამოჩნდა, რომ სურათები სინამდვილეში Canon-ით იყო გადაღებული.