გარემოს დაცვისა და სოფლის მეურნეობის მინისტრი, ლევან დავითაშვილი კახეთში მომხდარ სტიქიას გამოეხმაურა, სადაც სეტყვამ ვენახები გაანადგურა. დავითაშვილის თქმით, დაახლოებით 70 ჰექტარია მაღალი პროცენტით დაზიანებული და მევენახეები მის მთლიანად ჩაბარებას მაინც შეძლებენ.

"სხვადასხვა პროცენტით იქნება დაზიანებული, შესაბამისად სხვადასხვა ტიპის იქნება მოლაპარაკებაც, ასე რომ მევენახეები შეთანხმდებიან, მინიმუმ ეს თანხა ალბათ ხარჯებს დააფარინებს", - ამბობს დავითაშვილი.

სტიქიის გამო, კახეთში მევენახეებმა საპროტესტო აქციაც გამართეს. ისინი ფიქრობენ, რომ სახელმწიფოსგან შეთავაზებული პირობებით, ისინი იმ თანხებსაც ვერ ამოიღებენ, რაც ვენახის მოვლა-პატრონობას დაახარჯეს.

გუშინ, 18 აგვისტოს მოსულმა უხვმა ნალექმა და სეტყვამ კახეთში რამდენიმე ქალაქი დააზარალა, განსაკუთრებით კი თელავის მუნიციპალიტეტი, სადაც მოსახლეობას ვენახები და საზამთროს ბაღები დაესეტყვათ.