ეკონომიკისა და მდგრადი განვითარების სამინისტროს ინოვაციებისა და ტექნოლოგიების სააგენტოს, გაეროს ფონდის საერთაშორისო ბანაკის "ქალები მეცნიერებაში" მონაწილეები ესტუმრნენ. ბანაკს თბილისი პირველად მასპინძლობს და მასში მონაწილეობას იღებენ 15-18 წლის გოგონები ამერიკის შეერთებული შტატებიდან, სომხეთიდან, აზერბაიჯანიდან და საქართველოდან.

ბანაკის მონაწილეებმა ტექნოპარკის სივრცე და მისი მაღალტექნოლოგიური დანადგარები დაათვალიერეს, გაეცნენ ფაბლაბის სერვისებს და მიიღეს ინფორმაცია სხვადასხვა მაღალტექნოლოგიური პროდუქტის შესახებ. ინოვაციების სააგენტოს სტუმრებმა ფაბლაბის ვორქშოფში მიიღეს მონაწილეობა და დეტალურად გაეცნენ 3დე მოდელირების პრინციპებს. საინფორმაციო-შემეცნებითი ტურის შემდეგ ახალგაზრდები სააგენტოს თავმჯდომარის მოვალეობის შემსრულებელს, ავთანდილ კასრაძეს შეხვდნენ და დისკუსიის რეჟიმში ინოვაციების მნიშვნელობასა და ამ პროცესში სააგენტოს როლზე ისაუბრეს.

ბანაკის მიზანია ახალგაზრდებში STEAM (მეცნიერების, ტექნოლოგიების, ინჟინერიის, ხელოვნებისა და მათემატიკის) უნარ-ჩვევების განვითარება, ლიდერობის უნარების ჩამოყალიბება და თანატოლებს შორის გამოცდილების გაზიარება. ბანაკის ტრენერები არიან Google, Intel, Microsoft და მიკრობიოლოგიის ამერიკული საზოგადოების წარმომადგენლები აშშ-დან.

გოგოების სამეცნიერო ბანაკი წარმოადგენს აშშ-ის მთავრობის ინიციატივას, რომელიც გულისხმობს მომავალი ქალი ლიდერების გაძლიერებას STEAM დისციპლინებში, რათა ხელი შეუწყოს მსოფლიოში სტაბილურობასა და კეთილდღეობას. გენდერული თანასწორობისა და ქალების ეკონომიკური გაძლიერების ხელშეწყობა ათასწლეულის გამოწვევის კორპორაციის მისიის ერთ-ერთი მნიშვნელოვანი შემადგენელია, რაც ხელს უწყობს ქვეყნებში ეკონომიკურ ზრდას.