პარლამენტის უმრავლესობის დეპუტატის, დიმიტრი ხუნდაძის თქმით, თუ მმართველი პარტია დამოუკიდებელ კანდიდატს დაუჭერს მხარს, მის ქმედებებზე პასუხისგება ქართულ ოცნებას მოუწევს. დეპუტატი ამბობს, რომ მსგავსი მხარდაჭერის შემთხვევაში კანდიდატი უმრავლესობასთან ასოცირდება და სჯობს კანდიდატი თავადაც დაასახელონ.

"ერთ-ერთი დამოუკიდებელი კანდიდატის განცხადებებზე ისევ ქართულ ოცნებას აკითხავენ პასუხის გასაცემად. უმჯობესი იქნება, ქართულ ოცნება საარჩევნო პროცესში ჩაერთოს საკუთარი კანდიდატით", - ამბობს ხუნდაძე.

პარლამენტის თავმჯომარის, ირაკლი კობახიძის განცხადებით კი, მმართველ გუნდში იყო აზრთა სხვადასხვაობა, რომ ქართულ ოცნებას საპრეზიდენტო კანდიდატი ჰყოლოდა, თუმცა საბოლოოდ გადაწყდა, რომ ისინი არ წარდგებიან თავისი კანდიდატით.

მმართველ გუნდში არ ამბობენ, თუ ვის დაუჭერენ მხარს საპრეზიდენტო არჩევნებში. კობახიძის განცხადებით, ქართულ ოცნებას არ ეჩქარება პოზიციის დაფიქსირება, რადგან ჯერ დრო ისევ აქვთ.