საპარლამენტო უმრავლესობის წევრი სასულიერო პირების მოთხოვნას, რომ საკონსტიტუციო სასამართლომ მარიხუანის ლეგალიზაციისთვის ერს ბოდიში მოუხადოს, გამოეხმაურა. ქართული ოცნება — სოციალ-დემოკრატების წევრი, მირიან წიკლაური ამბობს, რომ თუ "მონდომება იქნება" შეიძლება, კონსტიტუციაში ცვლილებებიც შევიდეს და "ასე გადარჩეს ერი".

დეპუტატი დეკანოზ ანდრია ჯღამაიძის ინიციატივასაც გამოეხმაურა, რომელიც ფიქრობს, რომ მარიხუანის ლეგალიზაცია ერის ღალატის ტოლფასია და ამის გამო, საკონსტიტუციო სასამართლო გასაუქმებელია.

"ვფიქრობ, ყურადსაღები წინადადებაა და არცთუ უსაფუძვლო. საფიქრებელია, რომ შეიძლება ამ მიმართულებით, გარკვეული ნაბიჯებიც გადაიდგას", - ამბობს წიკლაური.

30 ივლისს საკონსტიტუციო სასამართლომ პარტია გირჩის წევრების სარჩელი დააკმაყოფილა, რითაც მარიხუანის მოხმარება სრულად ლეგალური გახდა. ეს ნიშნავს იმას, რომ თუ მოწევის დროს პოლიციამ დაგინახათ ან ორგანიზმში აღმოგიჩინეს მარიხუანა, ჯარიმა აღარ დაგეკისრებათ.