თეთრი ხმაურის მოძრაობის ლიდერი, ბექა წიქარიშვილი ბასიანის სპეცოპერაციის ღამეს წვრილმანი ხულიგნობის საქმეზე საქალაქო სასამართლომ 100 ლარით დააჯარიმა. როგორც სასამართლოს პრესსამსახურმა On.ge-სთან საუბრისას განაცხადა, წიქარიშვილს აღნიშნული ჯარიმა საზოგადოებრივი თავშეყრის ადგილზე ლანძღვა-გინებისა და ხმაურისთვის ადმინისტრაციულ სამართალდარღვევათა კოდექსის 166-ე მუხლით დაეკისრა.

სასამართლოს განხილვა დღეს, 31 ივლისს გაიმართა. სასამართლომ მოძრაობის ლიდერი პოლიციისთვის წინააღმდეგობის გაწევის ნაწილში გაამართლა, ამიტომ, მათი თქმით, ამავე კოდექსის 173-ე მუხლის ნაწილში სამართალწარმოება შეწყდა.

საქალაქო სასამართლო 12 მაისის ღამეს სამართალდამცველთა მიერ ბექა წიქარიშვილის დაკავების საქმეს განიხილავდა.

12 მაისს, დაახლოებით ღამის 12 საათზე თბილისის ორ ღამის კლუბში, ბასიანსა და გალერიში სპეცოპერაცია ერთდროულად დაიწყო. შინაგან საქმეთა სამინისტრო გავრცელებულ განცხადებაში აღნიშნული იყო, რომ სპეცოპერაციას წინ 3-თვიანი საგამოძიებო მოქმედებები უძღვოდა და მათ ნარკორეალიზების ბრალდებით რვა პირი დააკავეს.

სპეცოპერაციისას კლუბების სტუმრები გარეთ გაიყვანეს. კლუბ ბასიანთან დაპირისპირება იყო სამართალდამცავებსა და მოქალაქეებს შორის. სპეცოპერაციის დროს ადმინისტრაციული წესით 50-მდე პირი დააკავეს.