სამეგრელო-ზემო სვანეთის რეგიონში სოფელ ხაიშში გადაკეტილი გზა გაიხსნა. შინაგან საქმეთა სამინისტროს ინფორმაციით, გზის მონაკვეთზე მოძრაობა სრულად აღდგენილია.

უწყების განცხადებით, სამეგრელო-ზემო სვანეთის პოლიციის დეპარტამენტის თანამშრომლები ზუგდიდი-ჯვარი-მესტიის გზაზე გაჩერებული ავტოტრანსპორტის მოძრაობის ნაკადს არეგულირებენ და მგზავრთა უსაფრთხო გადაადგილებას უზრუნველყოფენ.

დღეს, 26 ივლისს ჭუბერსა და ხაიშში, სპეცდანიშნულების რაზმების გამოჩენას დაპირისპირება მოყვა. ადგილობრივებმა სპეცრაზმს სახლების ჩხრეკის უფლება არ მისცეს, ხელკეტები და ქვები დაუშინეს და გზა გადაკეტეს.

ფინანსთა სამინისტროს საგამოძიებო სამსახურის ინფორმაციით, ჭუბერსა და ხაიშში მოსახლეობა საგამოძიებო მოქმედებებს ხელს უშლიდა და სპეცრაზმის მობილიზებაც ამიტომ გახდა საჭირო.

უწყებაში ამბობენ, რომ სვანეთში ხე-ტყის გადამამუშავებელი და ხის მასალის რეალიზატორი საწარმოების საქმიანობის კანონიერების შემოწმება, ასევე რეგისტრაციის გარეშე მოქმედი ხის სახერხი საამქროების გამოვლენა მიმდინარეობს.