ახალი პოლიტიკური ცენტრი გირჩი საარჩევნო სუბიექტად ოფიციალურად დარეგისტრირდა. დღეს, ცენტრალურ საარჩევნო კომისიაში, პარტიის თავმჯდომარემ, ზურაბ ჯაფარიძემ, დარეგისტრირების შესახებ შესაბამისი განაცხადი შეიტანა. ჯაფარიძის თქმით, პარტია მუშაობას აპირებს "ქვეყნის ფეხზე დასაყენებლად":

"პოლიტიკურმა ცენტრმა გირჩმა გაიარა რეგისტრაცია, ცენტრალურ საარჩევნო კომისიაში. ჩვენ დავრეგისტრირდით როგორც საარჩევნო სუბიექტი, 8 ოქტომბრის საპარლამენტო არჩევნებისთვის და ჩვენ ვაპირებთ ბრძოლას იმისათვის, რომ ამ ქვეყანაში ეკონომიკა ამუშავდეს რაც შეიძლება სწრაფად. რაც შეიძლება სწრაფად დადგეს ქვეყანა ფეხზე".

გირჩის პოლიტიკური საბჭოს წევრი, ნინო დარსაველიძე აცხადებს, რომ გირჩი აპირებს ბრძოლას პარლამენტში შესასვლელად, იმ ზომის ფრაქციით, რომლის გარეშეც ვერ შედგება საკონსტიტუციო უმრავლესობა და ვერ მიიღებენ გადაწყვეტილებას "იმ ახალი სტანდარტების მქონე პარტიის გარეშე, რომელიც არის გირჩი".

ცენტრალური საარჩევნო კომისიის ინფორმაციით, 1 აგვისტოს მდგომარეობით, რეგისტრაციაზე განცხადება შეიტანა 61-მა პარტიამ, რეგისტრირებულია 29, რეგისტრაციაზე უარი ეთქვა 4-ს და რეგისტრაციის პროცესშია 28 პარტია.

2016 წლის საპარლამენტო არჩევნები 8 ოქტომბერს გაიმართება.