სამაგისტრო გამოცდებზე ინტერნეტში გავრცელებული ტესტის პასუხები არ გამოგადგებათ. გამოცდების ეროვნულ ცენტრში ამბობენ, რომ ცენტრის ვებგვერდზე 12 ივლისს გავრცელებული მონაცემები რეალური ტესტების პასუხები არ არის.

"ხაზგასმით გვინდა აღვნიშნოთ, რომ აღნიშნული მონაცემების, როგორც სწორი პასუხების გამოყენება ტესტზე მუშაობისას ერთმნიშვნელოვნად დააზარალებს მაგისტრანტობის კანდიდატს", - აღნიშნავენ საგამოცდო ცენტრში.

უწყების განმარტებით, გავრცელებული ტესტის პასუხები სწორი რომ არაა, ამაში მაგისტრანტობის კანდიდატები გამოცდებზე დარწმუნდებიან.

12 ივლისს გამოცდების ეროვნულმა ცენტრმა ვებგვერდზე შემთხვევით, სავარაუდოდ, სამაგისტრო გამოცდების სამომავლო ტესტირების პასუხები რამდენიმე წუთით გამოაქვეყნა. საუბარია მაგისტრატურის B და C ტესტის ტიპებზე, რომელიც 18-19 და 24-25 ივლისს უნდა ჩატარდეს. 11-12 ივლისს A ტეტის ტიპის გამოცდა ჩატარდა.