საქართველოს ეკონომიკის მინისტრობის კანდიდატის გიორგი ქობულიას განცხადებით, საქართველოს ეკონომიკური ზრდის პროცენტული მაჩვენებელი შთამბეჭდავია, თუმცა საქართველო მაინც ღარიბ ქვეყნებს შორის რჩება.

მისი თქმით, რიცხვების მიხედვით, დასაქმების მაჩვენებელი მომატებულია, პირდაპირი ინვესტიციებიც მაჩვენებელი კი რეკორდული.

"საქართველო ინიციატივების მიხედით ერთ-ერთ მოწინავე რეფორმატორ ქვეყანად მიიჩნევა. მეამაყება ეს სიტუაცია, რომელიც დღეს არის. ეს არის შედეგი იმისა, რაც გააკეთა მთავრობამ და სახელმწიფომ. რამდენიმე რეფორმამ, მაგალითად, საშემოსავლო გადასახადის რეფორმა, თავისუფალი ვაჭრობის შეთანხმებები, ინფრასტრუქტურის დაჩქარებით განვითარება, ბიზნესის ხელშეწყობასთან დაკავშირებული ინიციატივები, შეიტანა წვლილი და იყო ერთ-ერთი ძირითადი განმსაზღვრელი იმისა, თუ სად ვართ ჩვენ დღეს", - განაცხადა გიორგი ქობულიამ.

ქობულიას თქმით, მიუხედავად კარგი პროგრესისა, ის ეკონომიკური შემოსავალი, რომელსაც საქართველო ერთ სულ მოსახლეზე ქმნის არის ძალიან მცირე.

"ჩვენ ორჯერ და სამჯერ კი არა მოწინავე ქვეყნებს 10-ჯერ ჩამოვუვარდებით. მეორე სიღარიბის დონე არ მცირდება", - განაცხადა გიორგი ქობულიამ.

მისი თქმით, ეს არის შემოსავლების განაწილებისა და მოსახლეობის ფართო ფენების ეკონომიკურ საქმიანობაში ჩაურთველობის რეზულტატი. მისი შეფასებით, ძალიან ბევრი ხალხი დაბალი პროდუქტიულობის სფეროებშია ჩართული მაგალითად, სოფლის მეურნეობა.

პარლამენტში მთავრობის განახლებულ შემადგენლობას ფრაქციების, კომიტეტების, უმრავლესობის და უმცირესობის ფორმატებში უსმენენ.

14 ივლისს, პარლამენტის რიგგარეშე სხდომა გაიმართება, სადაც მთავრობისთვის ნდობის გამოცხადების საკითხი განიხილება.