სოფელ ჭუბერში სტიქიის გამო კიდევ ერთი სახლი ჩამოინგრა. საგანგებო სიტუაციების მართვის სამსახურის ცნობით, სახლიდან და ყველა საშიში ზონიდან გუშინ მცხოვრებლების ევაკუაცია განხორციელდა და ადგილიდან ყველა საჭირო ნივთიცაა გატანილი.

უწყების ცნობით, ჭუბერში მდინარე ნენკრას დონე პერიოდულად იმატებს და იკლებს, მსგავსი შემთხვევა კი სტიქიის გამო მოსალოდნელი იყო.

მათივე ინფორმაციით, ექსპერტები ამბობენ, რომ ამინდის გაუარესების შემთხვევაში სტიქიის იმავე დონით აღარ არის მოსალოდნელი.

5 ივლისს უხვი ნალექის შედეგად, სოფელ ჭუბერში მთის ნაწილის ჩამოშლამ მდინარე ნენსკრას ადიდება გამოიწვია. მდინარის კალაპოტიდან გადმოსვლის გამო დაიტბორა მიმდებარე ტერიტორია, რამაც ათეულობით თემი გარე სამყაროს მოწყვიტა. უხვმა ნალექმა ჩამორეცხა სოფლებს შორის დამაკავშირებელი საავტომობილო გზები.