ეროვნულ-დემოკრატიული ინსტიტუტის გამოკითხვის მიხედვით, გამოკითხულთა 43 პროცენტი მიიჩნევს, რომ ქალთა რაოდენობის ზრდას პარლამენტში დადებითი გავლენა ექნება, 39 პროცენტის აზრით, ეს არაფერს არ შეცვლის, 9 პროცენტი მიიჩნევს, რომ ამას ექნება უარყოფითი გავლენა, ხოლო ერთმა პროცენტმა არ იცის.

NDI-მ მოსახლეობას ასევე სთხოვა შეედარებინა ქალებისა და კაცების მუშაობა არჩეულ თანამდებობებზე. 16 პროცენტის მოსაზრებით ქალები მუშაობენ კაცებზე უკეთ, 21 პროცენტის მოსაზრება კი საპირისპიროა. ისინი მიიჩნევენ, რომ კაცები მუშაობენ ქალებზე უკეთ, ხოლო 58 პროცენტის შეფასებით, მათ შორის არანაირი განსხვავება არ არის.

NDI-ის კვლევის საველე სამუშაოები CRRC- საქართველომ ჩაატარა 2016 წლის 8 ივნისიდან 6 ივლისის პერიოდში. სულ მომზადდა 4 113 დასრულებული ინტერვიუ. განხორციელდა წარმომადგენლობითი შერჩევა ქვეყნის მასშტაბით, ამასთან, დამატებითი წარმომადგენლობითი შერჩევა თბილისში, ქალაქისა და სოფლის ტიპის დასახლებებში, ეროვნული უმცირესობებით მჭიდროდ დასახლებულ რეგიონებში. კვლევის საშუალო ცდომილების ზღვარი არის +/- 2,1%.