მეტროსადგურ "ვარკეთილის" ჩამონგრევის საქმეზე საქართველოს პროკურატურამ სამ პირს ბრალი წაუყენა. ბრალი წაეყენათ მეტროსადგურის რემონტის ჩამტარებელი კომპანიის ყვარელრემმშენის აღმასრულებელ მთავარ ინჟინერსა და მენეჯერს და სარემონტო სამუშაოს პროექტის ავტორი კომპანიის გეომეფის აღმასრულებელ დირექტორს.

"2017 წლის 19 აპრილს, გეომეფის ხელმძღვანელმა ყალბი კონსტრუქციული დასკვნა შეადგინა, რომელსაც პროექტის კონსტრუქტორის ნაცვლად, თვითონ მოაწერა ხელი, შემდეგ კი აღნიშნული დასკვნა თბილისის სარტრანსპორტო კომპანიის სამშენებლო სამსახურში წარადგინა. აღნიშნულის საფუძველზე, შპს ყვარელრემმშენმა განაახლა სამუშაოების შესრულება. შპს გეომეფის ხელმძღვანელმა გ.კ.-მ, ხელშეკრულებით დაკისრებული ვალდებულებების მიუხედავად, არაჯეროვნად შეასრულა თავისი სამსახურებრივი მოვალეობა და არ გაუწია პროექტს სათანადო საავტორო ზედამხედველობა", - აღნიშნულია პროკურატურის მიერ გავრცელებულ განცხადებაში.

პროკურატურაში აღნიშნავენ, რომ მის გეომეფის ხელმძღვანელმა შეიმუშავა მომხმარებლის სიცოცხლის და ჯანმრთელობის უსაფრთხოების მოთხოვნებთან შეუსაბამო სარემონტო-სარეაბილიტაციო დაგეგმარების პროექტი, გარდა ამისა კონსტრუქციულ დასკვნაში არ იყო გათვალისიწინებული ჭერზე უარყოფითი ფაქტორებით გამოწვეული დამატებითი დატვირთვები - მატარებლის მოძრაობა, სავენტილაციო ჰაერის მიმოქცევით გამოწვეული ქარის წნევა და სხვა.

უწყებაში აცხადებენ, რომ ყვარელრემმშენის არაჯეროვნად შეასრულა სამსახურებრივი მოვალეობა და შესრულებული სამუშაოების ხარისხიანად არ შეამოწმა. მათივე ინფორმაციით, მეტროსადგურში ჭერი პროექტის გარეშე და უხარისხოდ შეიკიდა.

საქართველოს პროკურატურაში აცხადებენ, რომ ბრალდებულებისთვის აღკვეთის ღონისძიების სახით, თითოეულისთვის 50 000 ლარის ოდენობით გირაოს შეფარდების შუამდგომლობით სასამართლოს უკვე მიმართეს.

უწყებაში აღნიშნავენ, რომ გამოძიების გაგრძელების პარალელურად ცალკე წარმოებად გამოყოფილია სისხლის სამართლის საქმე, შპს თბილისის სატრანსპორტო კომპანიის თანამშრომელთა მხრიდან შესაძლო სამსახურეობრივ გულგრილობაზე.

ვარკეთილის მეტროსადგურში ჭერის ჩამონგრევის გამო 30 იანვარს 14 ადამიანი დაშავდა.

ამავე თემაზე: