Ekhokavkaza-ს ინფორმაციით, ერევანში, ერებუნის რაიონში შეიარაღებული თავდამსხმელების მიერ დაკავებული შენობის მიმდებარედ პოლიციამ 30 მოქალაქე დააკავა, სამართალდამცავებმა ჩამოხიეს პლაკატები, რომლებიც ქვეყნის პრეზიდენტს, სერჟ სარგისიანს გადადგომისკენ მოუწოდებდა. ასევე ვრცელდება ინფორმაცია, რომ 2 ამბოხებული პოლიციას ჩაბარდა.

სომხეთის პოლიციის პრეს-სპიკერმა, აშოტ აგარონიანმა განმარტა, რომ 2 ამბოხებული, გაგიკ ეგიაზარიანი და არამ აკოპიანი სამართალდამცავებს ჩაბარდნენ:

"შეიარაღებული დაპირისპირება მოხდა, რის შედეგადაც სამართალდამცავი ორგანოს ერთ-ერთი წარმომადგენელი დაშავდა, ასევე პაველ მანუკიანი და მისი ვაჟი. სამივე გადაიყვანეს საავადმყოფოში. ამ ეტაპზე სროლა შეჩერდა და განახლდა მოლაპარაკებები იმისთვის, რომ შეიარაღებული თავდამსხმელების ჩაბარების პროცესი დასრულდეს".

აღნიშნულ ინფორმაციას ნაწილობრივ ადასტურებენ თავად ამბოხებულები და თავის Facebook გვერდზე წერენ, რომ მათი გუნდის წევრები პოლიციელებს კი არ ჩაბარდნენ, არამედ სამართალდამცავების შენობაში შეღწევის შემდეგ ატეხილი სროლის შედეგად დაშავდნენ, რის შემდეგაც პოლიციამ ისინი გაიტაცა.

თავად სამართალდამცავი უწყება განმარტავს, რომ შენობის ტერიტორიაზე კიდევ 2 დაჭრილი იმყოფება:

"მოლაპარაკებები გრძელდება, სამართალდამცავები ცდილობენ დაარწმუნონ ისინი, რომ მისცენ სამედიცინო დახმარების გაწევის საშუალება".

17 ივლისს ოპოზიციური მოძრაობის - დამფუძნებელთა პარლამენტის მეთაურის, ჟირაირა სეფილიანის გათავისუფლების მოთხოვნით შეიარაღებული დაჯგუფება პოლიციის შენობაში შეიჭრა და მძევლები აიყვანა.

სომხეთში მიმდინარე მოვლენების შესახებ დეტალურ ინფორმაციას შეგიძლიათ გაეცნოთ აქ: