სარალიძის ადვოკატის, ნესტან ლონდარიძის განცხადებით ის ფაქტი, რომ შინაგან საქმეთა სამინსიტრომ გამოძიება დაიწყო არ ნიშნავს იმას, რომ სამართლიანობა აღსდგება. მისი თქმით, მთავარია როგორ წარიმართება პროცესები.

ლონდარიძე აცხადებს, რომ არც პროკურატურის ნდობა აქვთ:

"იმ ეტაპზე, როცა იმის აღიარება კი არ ხდება, რომ მთავარმა პროკურატურამ შეიძლება ჩაიდინა კანონსაწინააღდეგო მოქმედებები პირიქით, თითქოსდა პროკურატურამ დიდი მუშაობა გაწია ყველაფერი ამისთვის. ეს კი მხოლოდ და მხოლოდ იმიტომ ხდება, რომ დაზარალებული მხარე დაარწმუნონ თავის კეთილგანწყობაში. ამ ეტაპზე ჩვენ არ გვაქვს ნდობა და ნდობის საფუძველი".

გუშინ, 31 მაისს თბილისის საქალაქო სასამართლომ ხორავას ქუჩის საქმეზე ერთი ბრალდებული სარალიძის ნაწილში გაამართლა, ხოლო მეორე ბრალდებულს სარალაძის ნაწილში მუხლი შეუცვალეს და განზრახ მკვლელობიდან, მკვლელობის მცდელობად გადაკვალიფიცირდა.

განაჩენის გამოცხადების შემდეგ ზაზა სარალიძემ პროკურატურასთან აქცია გამართა და შოთაძის გადადგომა და საქმეში გარეული პირების დასჯა მოითხოვა. რამდენიმე საათში ირაკლი შოთაძე გადადგა.

პარლამენტის თავმჯდომარემ, ირაკლი კობახიძემ განაცხადა, რომ საქმეზე საპარლამენტო საგამოძიებო კომისია შეიქმნება. ეს არის პირველი შემთხვევა, როდესაც სისხლის სამართლის დაუსრულებელ საქმეზე საპარლამენტო საგამოძიებო კომისია იქმნება. პრემიერმა კი განაცხადა, რომ საქმეს შსს უკან იბრუნებს და გამოძიება განახლდება.