ხორავას ქუჩაზე მოკლულის მამის ზაზა სარალიძის აქცია, რომელიც საქართველოს პროკურატურასთან დაიწყო და საქართველოს პარლამენტთან დასრულდა, დღეს 16:00-ზე განახლდება.

ამას გარდა, სტუდენტების მხარდამჭერი აქცია გაიმართება 18:00-ზე. აქციის მონაწილეები მსვლელობით 51-ე სკოლიდან პარლამენტისკენ გაემართებიან.

აქციის მონაწილეების მოთხოვნა უცვლელი იქნება: ხორავას ქუჩაზე მომხდარი მკვლელობის საქმის სამართლიანი გამოძიება.

"სტუდენტები ვემიჯნებით პოლიტიკურ პარტიებსა და პოლიტიკურ ინტერესებს", - აცხადებენ აქციის ორგანიზატორები.

31 მაისს სასამართლომ ხორავას ქუჩის საქმეზე დასკვნა გამოაცხადა. ხორავას ქუჩაზე მოკლული ლევან დადუნაშვილის მკვლელობის საქმეზე თბილისის საქალაქო სასამართლომ გამამტყუნებელი განაჩენი გამოიტანა. რაც შეეხება მეორე მოკლულს, დავით სარალიძეს, მისი მკვლელობის საქმეზე მოსამართლემ ბრალი მკვლელობიდან მკვლელობის მცდელობაზე გადააკვალიფიცირა. შესაბამისად, ამ დროისათვის უცნობია, ვინ მოკლა არასრულწლოვანი დავით სარალიძე.

სასამართლოს გადაწყვეტილებას მრავალათასიანი საპროტესტო აქციები მოჰყვა. თავდაპირველად ზაზა სარალიძემ აქცია პროკურატურასთან მთავარი პროკურორის ირაკლი შოთაძის გადადგომის მოთხოვნით გამართა. მას შემდეგ, რაც მთავარი პროკურორი, ირაკლი შოთაძე გადადგა აქცია საქართველოს პარლამენტთან გადმოინაცვლა.

აქციაზე #ნუმომკლავ ითხოვენ ყველა იმ პირის დასჯას, რომლებიც, მათი აზრით, ხორავას ქუჩის საქმის ფალსიფიცირებაში მონაწილეობდნენ. დემონსტრანტებმა სხვა მოთხოვნებიც წამოაყენეს, მათ შორის მთავრობის გადადგომა.