საკონსტიტუციო სასამართლოში მარიხუანას მოხმარებისთვის ადმინისტრაციული სასჯელის გაუქმებაზე, პარტია გირჩის სარჩელის არსებითი განხილვა ცოტა ხნის წინ დასრულდა. გადაწყვეტილების გამოცხადების თარიღი ჯერჯერობით უცნობია.

გირჩის ლიდერი ზურა ჯაფარიძე On.ge-სთან საუბარში ამბობს, რომ თუკი სასამართლო მათ სარჩელს დააკმაყოფილებს, ეს იქნება თავისუფლების იდეის გამყარება:

"ეცოდინება სახელმწიფოს, სად არის მისი საქმე, სად არ უნდა ჩაერიოს. ამაზე შეიძლება დავაშენოთ ბევრი რამ და ეს არ შეეხება მხოლოდ ნარკოპოლიტიკას. თავისუფლების წინ წამოწევისთვის, ბევრ სხვადასხვა თემაზე გახდება შესაძლებელი საკონსტიტუციოსთვის მომართვა".

ზურაბ ჯაფარიძის შეფასებით, დღევანდელ განხილვაზე მოსამართლეები იმავე ლოგიკას მიყვებოდნენ, რა ლოგიკაც გამოიყენეს "შანიძის საქმეზე", მაშინ როცა მარიხუანის მოხმარების დეკრიმინალიზაციას მხარი დაუჭირეს:

"საწინააღმდეგო მსჯელობა და არგუმენტაცია, რითიც შეიძლებოდა დაესაბუთებინათ და განსხვავებული გადაწყვეტილება შეიძლება გამოიტანონ, ამ მსჯელობის დროს არ მოგვისმენია, არც მოპასუხე მხარის მხრიდან და არც მოსამართლეების მხრიდან. მოლოდინი ოპტიმისტურია".

პოზიტიურად აფასებს პროცესის მიმდინარეობას გირჩის კიდევ ერთი წევრი იაგო ხვიჩია. ის On.ge-სთან საუბრისას აღნიშნავს, რომ მათ წარსული აკავშირებთ საკონსტიტუციო სასამართლოსთან:

"ის რაც სასამართლომ თქვა "შანიძის საქმის" დროს, ის აზრია რომელსაც გირჩი ავრცელებს საზოგადოებაში. ჩვენ და სასამართლო ვართ თანამოაზრეები".

საკონსტიტუციო სასამართლომ მარიხუანას მოხმარების დეკრიმინალიზაციას მხარი გასული წლის 30 ნოემბერს დაუჭირა.