ადამიანის უფლებათა ცენტრი მიიჩნევს, რომ არსებობს შემთხვევები, როცა სასჯელაღსრულებისა და პრობაციის სამინისტრო დაუსაბუთებლად აფერხებს მკვეთრად გამოხატული შეზღუდული შესაძლებლობების მქონე პატიმართა სამედიცინო დაწესებულებაში გადაყვანას და არ აწვდის მათ ეტლებს გადასაადგილებლად:

„არის შემთხვევები, როცა შშმ პატიმრებს არ უტარდებათ სათანადო მკურნალობა და მომსახურება, მათი ჯანმრთელობისა და ფიზიკური მდგომარეობის გათვალისწინებით“.

ადამიანის უფლებათა ცენტრის განცხადებით, მათ წარმოებაში აქვთ არაერთი საქმე, რომელშიც ასახულია, რომ სასჯელაღსრულების დაწესებულებებში მყოფი პატიმრები სამედიცინო მომსახურებას დროულად ვერ იღებენ:

„ზოგიერთ შემთხვევაში - სამედიცინო მომსახურების/საჭიროების მიღებაზე საერთოდ უარს იღებენ, ასევე შეფერხებულია სამედიცინო დაწესებულებაში მათი ტრანსპორტირება. ეს პრობლემები განსაკუთრებული სიმწვავით მკვეთრად გამოხატული შშმ პატიმართა საქმეებში იკვეთება“.

ადამიანის უფლებათა ცენტრის ცნობით, სასაჯელაღსრულებისა და პრობაციის სამინისტროს N 17 დაწესებულებაში სასჯელს იხდის მსჯავრდებული ლაშა მ., რომელიც პენიტენციურ დაწესებულებაში წამებისა და არაადამიანური მოპყრობისას მიყენებული დაზიანებების გამო, წლებია, ეტლს არის მიჯაჭვული და არ შეუძლია გადაადგილება:

„მსჯავრდებულს ხერხემალზე ესაჭიროება განმეორებითი მძიმე ოპერაცია, ასევე - სხვა სახის სამედიცინო გამოკვლევები.

8 ივლისს მსჯავრდებულის გეგმიური გაყვანა სამკურნალო დაწესებულებაში უნდა განხორციელებულიყო რეანიმობილით, რომელიც მას არ მიაყენებდა ფიზიკურ ტკივილს. პატიმარი ეტლით მოსარგებლეა და ხერხემლის ტკივილები აწუხებს.

N17 პენიტენციური დაწესებულების მთავარი ექიმის გადაწყვეტილებით, მსჯავრდებულის ტრანსპორტირება გადაწყდა შეუსაბამო ტრანსპორტით, რაზეც პატიმარი იძულებული გახდა უარი განეცხადებინა“.

ადამიანის უფლებათა ცენტრის განცხადებით, მათი არაერთი მოთხოვნის მიუხედავად, სასჯელაღსრულებისა და პრობაციის სამინისტროს სამედიცინო დეპარტამენტი მსჯავრდებულისთვის არ იყენებს რეანიმობილს, რაც მას ფიზიკურ ტკივილს არ მიაყენებს.

ადამიანის უფლებათა ცენტრის არაერთი მოთხოვნის მიუხედავად, სასჯელაღსრულებისა და პრობაციის სამინისტროს სამედიცინო დეპარტამენტი მსჯავრდებულისთვის არ იყენებს რეანიმობილს, რაც მას ფიზიკურ ტკივილს არ მიაყენებს.

"პატიმარს უფლება აქვს, მიიღოს კვალიფიციური, ადეკვატური სამედიცინო მომსახურება, რაც არა მარტო სამედიცინო ხასიათის კონსულტაციას მოიცავს, არამედ სათანადო მკურნალობას, რაც მიმართული იქნება ადამიანის გამოჯანმრთელებისკენ და არა ჯანმრთელობის მდგომარეობის გაუარესებისაკენ.

სახელმწიფო პასუხისმგებელია პატიმრობაში მყოფ ყველა ადამიანზე, რომლებიც მთლიანად სახელმწიფოს ძალაუფლების ქვეშ არიან" - აცხადებს ადამიანის უფლებათა ცენტრი.