კომპანია სვანეთი ჰიდრომ, რომელიც სვანეთში მესტიაჭალაჰესს აშენებს, მესტიაში ადგილობრივი ტურიზმის ხელშეწყობის მიზნით საოჯახო სასტუმროებისთვის მართვის ტრეინინგი ჩაატარა. აღნიშნული სოციალური პროექტი ზაფხულის სეზონისთვის საოჯახო სასტუმროებს სერვისის გაუმჯობესებასა და უფრო მეტი ტურისტის მოზიდვაში დაეხმარება.

როგორც სოფიო ნატროშვილი, სვანეთი ჰიდროს საინფორმაციო ცენტრის ხელმძღვანელი ამბობს, ასეთი ტიპის ტრენინგები მესტიის მოსახლეობას საოჯახო სასტუმროების ბიზნესის წამოწყებასა დასტანდარტების დაკმაყოფილებაში დაეხმარება.

ორდღიან ტრენინგს 20-ზე მეტი სასტუმროს წარმომადგენელი დაესწრო და მათ კონკრეტული რჩევები მიიღეს წარმატებული ბიზნესის შესაქმნელად.

"ძალიან კმაყოფილი ვარ ამ ტრენინგით", - ამბობს ლელა შერვაშიძე, რომელიც მესტიაში საოჯახო სასტუმროს მართავს, - "ტურისტული სეზონი უკვე გააქტიურდა და იმ ცოდნას, რომელიც შევიძინე, აუცილებლად გამოვიყენებ ბიზნესის განვითარებისთვის".

ტრენინგის დასრულების შემდეგ მონაწილეებს სერტიფიკატები გადაეცათ.

კომპანია ადგილობრივი მოსახლოების მხარდასაჭერად და გასაძლიერებლად სხვადასხვა მიმართულების სოციალურ პროექტებზე მუშაობს, რაც განათლების, სპორტისა და ტურიზმის ხელშეწყობას გულისხმობს. სვანეთი ჰიდრომ მესტიის მოსახლეობისთვის უკვე 1 მლნ ლარის სოციალური და ინფრასტრუქტურული პროექტები განახორციელა.