როიტერის ინფორმაციით, თურქეთის მთავრობა აცხადებს, რომ ბრიუსელის ტერორისტული აქტის მოწყობაში ეჭვმიტანილი ძმებიდან ერთ-ერთი, იბრაჰიმ ელ ბაკრაოუი გასულ წელს თურქეთში, სირიის საზღვართან დააკავეს და ქვეყნიდან გააძევეს. თურქეთის პრეზიდენტის, რეჯეფ თაიფ ერდოღანის თქმით, მოსალოდნელი საფრთხის შესახებ თურქეთმა ბელგია გააფრთხილა, თუმცა ინფორმაციას ბელგიის მხრიდან რაიმე კონკრეტული ნაბიჯები არ მოჰყოლია:

"ბრიუსელის თავდასხმაში ეჭვმიტანილი ერთი-ერთი პირი ჩვენ 2015 წლის ივნისში დავაკავეთ და გავაძევეთ. ამის შესახებ ცნობები ივლისში ანკარაში მოქმედ ბელგიის საელჩოს მივაწოდეთ, თუმცა მოგვიანებით დაკავებული მაინც გაუშვეს. ბელგიამ იგნორირება გაუკეთა ჩვენს გაფრთხილებას იმის შესახებ, რომ ეს პირი უცხოელი მებრძოლი იყო".

ერდოღანის თქმით, როდესაც ბაკრაოუი დააკავეს და ნიდერლანდებში გააძევეს, თურქეთის მთავრობამ ნიდერლანდები მოსალოდნელი საფრთხის შესახებ გააფრთხილა. მიუიხედავად ამისა, ნიდრლანდების მთავრობამ განაცხადა, რომ ბაკაროუის ნიდერლანდებში ყოფნას ვერ ადასტურებდნენ.

გაუგებარია, როდის გადაეცა ბელგიის ხელისუფლებას ბაკრაოუი, თუმცა მოგვიანებით ცნობილი გახდა, რომ ბელგიის სამართალდამცავმა ორგანოებმა ის გაათავისუფლეს. აღნიშნულის მიზეზად დასახელდა ის, რომ ბაკრაოუის ტერორისტულ ორგანიზაციებთან კავშირის დამადასტურებელი ვერანაირი მტკიცებულებას ვერ მიაგნეს.

ბელგიის მთავრობის განცხადებით, კრიმინალის დამადასტურებელი მტკიცებულებების არქონის შემთხვევაში, მათ თურქეთიდან უბრალოდ გაძევებულ ადამიანის ციხეში ჩასმა არ შეუძლიათ. მათი თქმით, პარიზის ტერაქტში ეჭვმიტანილი აბდესლამის შემთხვევაც, რომელიც მანამდე ასევე თურქეთიდან იყო გაძევებული, სწორედ ასეთი იყო.