თბილისის მერმა კახა კალაძე პარლამენტთან მიმდინარე აქციის დასრულების შემდეგ, ჟურნალისტებთან კომენტარი გააკეთა და შინაგან საქმეთა მინისტრს გიორგი გახარიას მადლობა გადაუხადა.

თბილისის მერის თქმით, გიორგი გახარიას განცხადება იყო ღირსეული ნაბიჯი.

"ეს ყველაფერი მეტყველებს იმაზე, რომ ჩვენ ვართ ხალხის ხელისუფლება , ჩვენ ვართ უშუალო ადამიანები, გვაქვს პირდაპირი კომუნიკაცია ახალგაზრდებთან, მოსახლეობასთან. ახალგაზრდებთან ერთად ვიბრძოლებთ ნარკორეალიზატორებისა და ნარკოტრეფიკის წინააღმდეგ", - განაცხადა კახა კალაძემ.

მისი თქმით, შეიძლება ყველა სპორტსმენი ვერ გამოვიდეს, მაგრამ ჯანსაღი ცხოვრების წესით ცხოვრება მნიშვნელოვანია.

პარასკევს, 12 მაისს, ბასიანსა და გალერიში ჩატარებული სპეცოპერაციის შემდეგ, პროტესტის ნიშნად გამართული აქცია დასრულდა. აქციის ორგანიზატორებმა შინაგან საქმეთა მინისტრთან შეთანხმებას მიაღწიეს.

ხვალ, შს მინისტრი უპასუხებს პარასკევის სპეცოპერაციასთან დაკავშირებულ ყველა კითხვას. მან პირობა დადო, რომ დაისჯება ყველა სამართალდამცველი, ვინც უფლებამოსილებას გადაამეტა და ასევე დაჩქარდება ნარკოპოლიტიკის რეფორმის მიღება.