ბელგიელმა სამართალდამცავებმა პარიზის ტერაქტების ორგანიზებაში ეჭვმიტანილი სალეჰ აბდესლამის ერთ-ერთი თანამზრახველის ვინაობა დაადგინეს. BBC-ის ინფორმაციით, DNM-ის მიხედვით, იგი ამჟამად ძებნილი 24 წლის ნაჯიმ ლაშრუია. DNM იმ სახლებიდან აიღეს, რომლებსაც ეჭვმიტანილი ჯიჰადისტები იყენებდნენ.

პარიზის ტერაქტის მოწყობაში ბრალდებული სალეჰ აბდესლამი 18 მარტს ბელგიაში დააკავეს. მისი ადვოკატი აცხადებს რომ აბდესლამი ფრანგ პროკურორს კონფიდენციალობის დარღვევისთვის უჩივლებს. BBC-ის ცნობით, როგორც პროკურორმა ჟურნალისტებს განუცხადა, აბდესლამმა აღიარა, რომ 13 ნოემბერს თავის აფეთქებას ნამდვილად აპირებდა, თუმცა გადაიფიქრა.

ოთხთვიანი დევნის შემდეგ, აბდესლამი ბელგიაში გასულ კვირას დააკავეს და ჯერ კიდევ დაკითხვის რეჟიმში იმყოფება. ბელგიურმა პოლიციამ იგი ტერორიზმში სცნო დამნაშავედ. მისი ადვოკატის თქმით, სალეჰ აბდესლამი ხელისუფლებასთან თანამშრომლობს.

ბელგიის პოლიციის განცხადებით, აბდესლამმა ორჯერ იმოგზაურა ბუდაპეშტში დაქირავებული მანქანით. იმ დროისთვის, მასთან ერთად კიდევ ორი მამაკაცი - სამირ ბუზიდი და სოფიან კაიალი იმყოფებოდა. DNM-ის მიხედვით, სწორედ ეს უკანასკნელი აღმოჩნდა 1991 წელს დაბადებული ლაშრუი. ბრალდების მხარე ყველას მოუწოდებს მის შესახებ ინფორმაციის მიწოდებისკენ. რაც შეეხება მეორე პირს, სამირ ბუზიდს, იგი ბელგიის პოლიციის სნაიპერმა 15 მარტის რეიდის დროს მოკლა.

გასული წლის 13 ნოემბერს, პარიზში მომხდარ ტერაქტზე პასუხისმგებელი ე.წ. ისლამური სახელმწიფოა, რის შედეგად, 130 ადამიანი დაიღუპა და ათობით დაშავდა.